________________
આત્મદર્શન' અને આત્મતત્ત્વ દર્શન’ – ગ્રંથો વિશે
- કનુભાઈ એલ. શાહ કવિ, લેખક, યોગી, અવધૂત, વિદ્વાન, તત્ત્વવેત્તા, વક્તા જેવાં તત્ત્વો એક જ વ્યક્તિના સરનામે જોવા મળે તેવું વ્યક્તિત્વ એટલે આપણા જ્ઞાનયોગ, ધ્યાનયોગી અને કર્મયોગી આચાર્ય શ્રીમદ્ બુદ્ધિસાગરસૂરીશ્વરજી મહારાજ.
વિક્રમનું બે હજાર ને સિત્તેરમું વર્ષ અનેક ગુણોના ભંડારસમા શ્રીમદ્ બુદ્ધિસાગરસૂરિજીનું આ સૂરિશતાબ્દીનું વર્ષ છે. આ બુદ્ધિસાગરસૂરીશ્વરજીને અઢારે આલમના લોકો એક સંત તરીકે ઓળખે છે, એમને પૂજે છે અને એમને “અવધૂત'ના ઉપનામથી ઓળખે છે. જનસમૂહ યોગનિષ્ઠ આચાર્ય ભગવંતશ્રીને સદ્ભાવથી માન અર્પે છે.
એ સમયે સમાજ અંધશ્રદ્ધા અને કુરિવાજોમાં ફસાયો હતો, શિક્ષણનો પ્રચાર-પ્રસાર ન હતો, લોકો ગરીબીમાં સબડતા હતા, એવા સમયે પ્રજામાં નવી જાગૃતિની લહેર પ્રસરાવવા ઓગણીસમી સદીના ઉત્તરાર્ધમાં અને વીસમી સદીના પ્રારંભે વિ. સં. ૧૯૩૦ મહા વદિ ચૌદશ, શિવરાત્રિના દિવસે ગુર્જરદેશની ગુણિયલ ભૂમિ વિજાપુરમાં એક કણબી પટેલના કુટુંબમાં બહેચરનો જન્મ થયો. માતાનું નામ અંબા અને પિતાનું નામ શિવાભાઈ.
