________________ વિશાળ જ્ઞાનસાગરનાં કેટલાંક મોતી જ્ઞાનયોગી, કર્મયોગી અને ધ્યાનયોગી આચાર્ય શ્રીમદ્ બુદ્ધિસાગરસૂરીશ્વરજી મ.સા.ની સૂરિશતાબ્દીના પ્રસંગે “અમર ગ્રંથશિષ્યો' સર્જનાર આચાર્યશ્રીનું આગવી રીતે પુનઃ સ્મરણ-મનન કરવામાં આવ્યું. એમની જ દીક્ષાભૂમિ પાલનપુરની ધરતી પર જ્ઞાનના વિશાળ સાગર સમા યોગનિષ્ઠ આચાર્ય શ્રીમદ્ બુદ્ધિસાગરસૂરીશ્વરજી મ.સા.નાં ગ્રંથરત્નો વિશે પરિસંવાદ યોજાયો. ગચ્છનાયક આચાર્યશ્રી મનોહરકીર્તિસાગરસૂરીશ્વરજી મહારાજની નિશ્રામાં અને આચાર્યશ્રી ઉદયકીર્તિસાગરસૂરીશ્વરજીના આશીર્વાદ સાથે સૂરિશતાબ્દીએ વિશાળ જ્ઞાનસાગરનાં થોડાં મોતીઓનું સંભારણું લઈને જુદા જુદા વિષયના લેખકો, વક્તાઓ અને તજજ્ઞો આવ્યા અને એક ચિંતનપ્રેરક અને હૃદયસંતર્પક પરિસંવાદ યોજાયો. યોગનિષ્ઠ આચાર્યશ્રી વિ.સં. 1981 જેઠ વદ ત્રીજના રોજ વિજાપુરમાં કાળધર્મ પામ્યા. એ નોંધવું જોઈએ કે ૧૯૮૧માં એમનો ક્ષરદેહ વિદાય પામ્યો, એ પછી ક્યારેય એમના વિપુલ અને પ્રભાવક અક્ષરદેહ વિશે સાથે મળીને પરિસંવાદ રૂપે આવું ચિંતન કર્યું નથી. આનાથી સહુને ખ્યાલ આવ્યો કે માત્ર એકાવન વર્ષના આયુષ્યમાં અને ચોવીસ વર્ષના સર્જનકાળમાં યોગનિષ્ઠ આચાર્યશ્રીએ 140 જેટલાં પુસ્તકોનું સંસ્કૃત, પ્રાકૃત, ગુજરાતી અને હિંદીમાં સર્જન કર્યું. ઉત્કૃષ્ટ સાધુતા, પ્રચંડ યોગસાધના અને 22000 ગ્રંથોના વાચનનું દોહન એમના આ જ્ઞાનસાગરમાં છલકાય છે. એ જ્ઞાનસાગરનું માત્ર એક જલબિંદુ એટલે આ સૂરિશતાબ્દીનું સંભારણું” ગ્રંથ, જેને નીરખીને આપણે એમની વિરાટપ્રતિભાપુંજને પામીને ધન્ય બનીએ. પ્રકાશક શ્રી મહુડી (મધુપુરી) જૈન શ્વેતાંબર મૂર્તિપૂજક ટ્રસ્ટ તથા સંઘ મહુડી
