________________
મંગલકામના
પરમ પૂજ્ય પ્રશાંતમૂર્તિ આચાર્ય શ્રી મનોહરકીર્તિસાગરસૂરીશ્વરજી મ.સા.
જ્ઞાન, ધ્યાન અને યોગના મહાસાગરનું સ્મરણ
‘આજે યોગનિષ્ઠ આચાર્યશ્રીમદ્ બુદ્ધિસાગરસૂરીશ્વરજીના સૂરિશતાબ્દી વર્ષના પાવન પ્રસંગે યોજાયેલો પરિસંવાદ અને અન્ય આયોજનો એ આપણા જીવનના ટર્નિંગ પૉઇન્ટનો દિવસ છે. ઐતિહાસિક એવો જીવનપરિવર્તનનો દિવસ છે. ગુરુદેવ યોગનિષ્ઠ આચાર્ય શ્રીમદ્ બુદ્ધિસાગરસૂરીશ્વરજી મહારાજાએ વર્તમાન જગત પર શું ઉપકાર કર્યો છે, તેનું પાવન સ્મરણ કરવાનું છે. એ મહાન ગુરુભગવંત આપણને શું શું આપીને ગયા ? કેટલું બધું વિપુલ સાહિત્ય આપીને ગયા છે, વિવિધ વિષયોમાં સર્જન કરીને ગયા છે, પરંતુ આપણે જે રીતે વિતરણ કરવું જોઈએ, જન-જન સુધી પહોંચાડવું જોઈએ તે નથી કરી શક્યા તે કમનસીબી છે. પરિણામે એમના અનુપમ સર્જનનો જે લાભ મળવો જોઈએ તે નથી મળ્યો. ગુણાતીત અવસ્થા, દેહાતીત અવસ્થા, ચિદાનંદ સ્વરૂપી એવો ભાવ ગુરુદેવના જીવનમાં નિહાળવા મળે છે.
