Ananthnath Jina Chariyam

Author(s): Nemichandrasuri, Jitendra B Shah, Rupendrakumar Pagariya
Publisher: L D Indology Ahmedabad

Page 678

धूवसुंदरनिवकहा
६४९
साहम्मियवच्छल्लं कुणइ पयट्टावए अमारीओ । किं बहुणा तित्थसमुन्नइकरं आगंतुमवणिवइणो तं ॥ ८३३५ ॥ तप्पुन्नपगरिसागरिसिय व्व आगंतुमवणिवइणो तं । सेवंति सव्वदेसुब्भवा वि गुरुभत्तिराएण ॥ ८३३६ ॥ तेणावलोईओ जो मन्नइ सो अप्पममयसित्तं व । आभासिओ पुणो तिहुयणेक्करज्जाहिसित्तं व ॥ ८३३७ ॥ एवं बहुकालं पालिऊणमकलंकरज्जमवणिवई । कुमरं पयावसाराभिहं ठवेऊण रज्जम्मि ॥ ८३३८ ॥ निग्गंथगुरुसमीवे दिक्खं घेत्तुं कयुग्गतवचरणो । उप्पन्नविमलनाणो संपत्तो मोक्खमक्खेवा || ८३३९ ॥ जह धूवब्भवपूया जाया एयस्स मोक्खसोक्खकए । तह अन्नस्स वि जायइ ता भव्वा तीए उज्जमह ॥ ८३४० ॥ एसो हु धूवपूयाए साहिओ धूवसुंदरो इन्हेिं । भुवणप्पईवनिवई दीवयपूयाए निसुणेह ॥ ८३४१ ॥ (दीवयपूयाए भुवणप्पईवनिवकहा) उल्लसिय रायसिरिकरणसुंदरं ललियविलयपरिकलियं । अत्थि सुरग्गामजुयं गीयं पिव भुवणविजयपुरं ॥ ८३४२ ॥ कलहसियरायभवणं कलहसिय विरायमाणसुयणं जं । कलहरियरहियसलिलं कलहरियतत्तप्पहीणजणं ॥ ८३४३ ॥ पूरिय पउरपयासो सव्वुत्तमनिद्धपत्तआहारो । दीवो व्व महीनाहो कुलप्पईवो त्ति तत्थत्थि ॥ ८३४४ ॥ सरहो वि विउलवच्छो वि दीहवाहो वि विलसिरगओ वि । सारंगो वि न तिरिओ उत्तमपुरिसो च्चिय सया जो ॥ ८३४५ ॥ गोरी विअ भीमपिया साएयतणया वि अजडसयणसिया । तस्सत्थि धारिणिपिया सइ वि जाणिंदपियभोया ॥ ८३४६ ॥