Ananthnath Jina Chariyam

Author(s): Nemichandrasuri, Jitendra B Shah, Rupendrakumar Pagariya
Publisher: L D Indology Ahmedabad

Page 770

७४१
जिणनिव्वाणवण्णणं सेलेसीकरणहुयासणेण निद्दहिय भवनिवासकरं । वेयणियनामगोत्ताओ लक्खणं कम्मवणगहणं ॥ ९५२४ ॥ सामी अणंतनाहो जिणेसरो सत्तसहससंखेहिं । पत्तो अणंतनाणीहिं सह मुणीहिं महाणंदं ॥ ९५२५ ॥ एत्थंतरम्मि निय निय सह निविट्ठाण सव्वइंदाण । सीहासणाण जाओ कंपो मणिकिरणकलियाण ॥ ९५२६ ॥ तो ते झड त्ति नियनाणनायजिणरायसिद्धिगइगमणो । जाया परिवारजुया वि सोयसंभारसाममुहा || ९५२७ ॥ निस्सिंगारा आरुहिय मणिविमाणाई अच्छरा सहिया । पत्ता अणुब्भडट्ठियं च अंसुधाराहिं विरयंता ॥ ९५२८ ॥ (जुयलं) परिदेवंते बहुसो य दीणवयणम्मि सयलसंघम्मि । अक्कंदंते संकंदणाइए सुरसमूहम्मि ॥ ९५२९ ॥ पणमित्तु पहुं अक्कंदिउं बहुं गग्गयस्सरं सव्वे । जगगुरुविओयविहुरा एवं परिदेविडं लग्गा ॥ ९५३० ॥ वयणं व नयणहीणं जायं ति जयं पि निग्गया लोयं ।। तिहुयणपहुम्मि जाए जसावसेसे जिणेणंते ॥ ९५३१ ॥ इन्हिं कस्स सयासे निसुणिस्सामो नवा वि तत्ताई । पुच्छिस्सामो य तहा विगयगए निययसंदेहे ॥ ९५३२ ।। दाही करावलंबं को नरयपडंतजंतुजायस्स ।। निस्साहारणकरुणारसपत्तं सामियं मुत्तुं ॥ ९५३३ ॥ एवं परिदेवंतेहिं तत्थ अणंतसामिणो देहो । गंधसलिलेण ण्हविऊण लिंपिओ चंदणरसेण ॥ ९५३४ ॥ सव्वंगमलंकरिओ सुरवत्थाभरणकुसुमनियरेण । ठविओ मणिसिबियाए धयालिरणज्झणिरघंटाए || ९५३५ ॥ सुरकयताडियदुंदुहिरवपडिसद्देहिं सह नरसुरेहिं । अक्कंदए गिरिंदो कयजिणसिवगमणसोओ व्व ॥ ९५३६ ॥