Jugaijinandachariyam

Author(s): Vardhmansuri, Rupendrakumar Pagariya, Dalsukh Malvania, Nagin J Shah
Publisher: L D Indology Ahmedabad

Page 242

सिरिरिसहसामिदेसणा
२०१५
घणघणपडलंतरिओ गयतेओ जइ वि दिणयरो जाओ। ता किं घणमुक्कतणू न तवइ महिमंडलं सूरो ॥२२३४।। जंकणयं कणयं चिय न होइ कालेण तं पुणो लोहं । इय नाणगुणसमिद्धा जे साहू ते पुणो साहू ॥२२३५।। संता वि उवाएणं हुंति कसाया किसा सउण्णाण। निरुवायाण असंता, वि हुँति संता वि वढ्डंति ॥२२३६॥ सोऊण कसायाण कडुयविवागं कुणालकुमरस्स । कुंभुब्भवोदएणं जलं वि विमलं मणं जायं ॥२२३७॥ एत्थंतरम्मि केरलकुमरो करसंपुडं करेऊण । तिहुयण गुरुं जिणिदं पणमिय एवं पयंपेइ ॥२२३८॥
हय-गय-रहरमणीया पुरोपसप्पंतपउरपंतीया। सयलसुहाण निहाणा लच्छी कह छड्डिउं सक्का ॥२२३९।। भगवया भणियं-"केरलकुमार !" सुणेह लच्छीए चरियं । एसा लच्छी मरणदाणदच्छी पारियायपल्लेवेहितो रागं, ससिकलाहितो वंकत्तणं, अमरवइतुरंगाहिंतो चंचलत्तणं, कालकूडाहिंतो महामोहसत्ति, मयराहिंतो मयं, कुच्छुभमणिरयणाहिंतो निठुरत्तणं, नियसहोयरविओया सुहविणोयणत्थं एए गुणे गहाय-सायराओ निग्गया। न एवंविहं सयल तिहयणे वि विम्हियावहामिदयालं विज्जइ जहेसा अणज्ज-वज्जासिरी पढम पि ताव महाकिलेसेण लब्भइ। लद्धा वि दुहेण परिपालिज्जइ। बहुगुणपासपासिया वि नासइ महासुहडासिलया पंजरमज्झगया वि पवंचेइ मयजलजणियदुद्दिणंधयारगयघडा परिपालिया वि पलायइ, न मन्नइ पच्चयं,न गणइ कुलाकुलं, न निरूवेइ रूवं, न सीलेइ सीलवंतं, न गणेइ वियड्ढत्तणं, न सुयं, न धम्म, नायारं, न लक्खणं', गंधव्व-नयर-लेह व्व पेच्छंताणं चेव विहडइ, कमलिणी-वणसंचरण नलिण-नालालग्गकंटय व्व निब्भरं कहिंपि ठिइं बंधइ, समुचियमूलदंडकोसमंडलं दिवसावसाणे कमलं व निरावराहमवि परिहरइ, पत्थिवलय व्व समारोहइ विडवगाणं, दिवसयरगइ व्व-पयडियाणेगसंकति सया पायालगुह व्व तिमिरावहा, पाउससिरि ब्व अचिरजुइकारिणी, सरस्सइसमालिंगियसरीरं ईसालुयाए दूरं परिहरइ पुरिसं, अपवित्तं च न फुसइ नियकरेहिं गुणवंतं, अमंगलमिव परिहरइ दायारं, अनिमित्तमिव न पासइ सुयणजणं, कंटयं व दूरेण परिहरइ सूरं, पावकम्मकारिणं व नोसवप्पइ विणीयं, उम्मत्तं च मन्नमाणी उवहसइ पंडियजणं, अमियसहोयरा वि कडुयविवागा विग्गहवई वि अपच्चक्खदसणा, पूरिसोत्तिमरया वि खलजण पिया, किं च-अइबहलधूसर-धूमावली सुंदरचित्ताणं, विन्भमसेज्जा दीहरमोह-निहाणं, तिमिरुग्गईलोयलोयणाणं, महावेजयंती अविणयाणं, अवायमेइणीविसयासवाणं, संगीयसाला ईसरियवियारनट्टाणं, आवासदरी कोवमहाभुयंगमाणं, ओसारणवेत्तलया सप्पुरिसववहाराणं, अकालपाउसो गुणधयरट्टाणं, विसरणभूमीलोगाववायविप्फोडगाणं, पत्थावणा कवड-नाडयस्स, कवलिया काममहाकरिणो बज्झमाला साहुभावस्स, राहुरसणा धम्ममयलंछणमंडलस्स, न य सो तिहुयणे वि नरामराण मज्झे अत्थि जो इमीए कुलबालिया इव निक्कवडसाणुरायमालोइओ। एवंविहाए वि लच्छीए कहकह वि दिव्ववसेणं समालिंगिया कुडिलकामिणीए व्व पम्हटकज्जाकज्जा, न पणमंति तियसे न सम्माणिति गुरुजणे, न पसंसंति गुणिणो, न थुणंति मुणिणो, नालवंति बंधुणो, न पूयंति जणणि-जणए, नावेक्खंति कल्लाणमित्ते, सव्वहा दुटुतुरंगम व्व उद्दामगामिणो, करिवर व्व निरंकुसा पलयजलनिहि व्व मुक्कमज्जायाखयकालरविणो व्व करचंडा, ससिणो व्व पायडियदोसागमा, महमहविलास व्व नियडिकवडमाया, परवंचणपरायणा हवंति खलपूरिसो त्ति। अवि य---
एवं गुणकलियाए वि इमीए कहकह वि संगया पुरिसा। जर-गहिया विव धणियं आउलचित्ता दढं हुंति ।।२२४० ।। सलिलेण व दक्खिण्णं खालिज्जइ धूमसंचएणं व। मलिणी किज्जइ हिययं लच्छी सहियाण पुरिसाण ।।२२४१।। चामरपवणेहिं पिव, नासिज्जइ सच्चवयणसंदोहो। परलोगदसणं पिव वारिज्जइ आयवत्तेहिं ।।२२४२।।
१. तो गयं ससिसकला पा० । २. परिचयं पा० । ३. न रक्खणं जे० । ४. कदलिया। ५. निहिणो व्व जे०। निवहो व्व पा०। ६. मुहमह व्व जे०।