________________
(१२) श्री जयसिंहसूरिविरचितश्रीधर्मोपदेशमाला-विवरणान्तर्गता 'श्रीअरिष्टनेमिजिनस्तुतिः'
(ई० स० ८५९)
(गाथाछन्दः) जय सुरसेल-विभूसण ! जय जय इंदंक-वड्डियाणंद । जय णिव्वत्तिय मज्जण ! जय जय सुंदरी-पणय ! ॥ १ ॥ जय हरिचंदण-चच्चिय ! जय जय मणि-मउड-भूसिय-सरीर ! । जय सेयंबर-धारय ! जय जय सियकुसुम कय-सोह ! ॥ २ ॥ जय इंदावलि-संथुय ! जय जय जणणीप(ए) वड्डियाणंद ! । जय बाल ! अबाल-विसिट्ठ-चेट्ट ! जय जोव्वणं पत्त ! ॥ ३ ॥ जय रायलच्छि-भूसिय ! जयसि दसारोह-णहयल-मियंक !। जय सिवदेवी-णंदण ! जय दाविय-कण्ह-णिय-वीरिय ! ॥ ४ ॥ जय अकय-दार-संगह ! जय जय उज्जत-गहिय-सामन्न ! । जय देवदूस-धारय ! जय जय सुर-मणुय-णय-चलण ! ॥ ५ ॥ जय चउणाणिमुणीसर ! जय जय उवसग्गदलणमुणिचंद ! । जय केवललच्छीवरियवरय ! जय देवणयचलण ! ॥ ६ ॥ जय दढपावणिसूडण ! जय जय सुर-सिद्ध-पणय-कम-कमल ! । जय गय-गमण ! सुरच्चिय ! जय लोह-समुद्द-गय-पार ! ॥ ७ ॥ जय मयणानल-जलहर ! जय जय णेद्दलिय-गरुय-दढ-माण ! । जय सिद्ध ! सिद्ध-सासण ! जय जय भुवणम्मि सुपसिद्ध ! ॥ ८ ॥ जय इंदीवर-विब्भम ! जय जय गुण-रयण-सागर ! मुर्णिद ! । जय पाउस-जलय-समाण-सद्द ! जय पउम-कय-चलण ! ॥ ९ ॥ जय गोविंद-णमंसिय ! जय जय नीसेस-बंधण-विमुक्क ! । जय नाह ! णाण-सागर ! जय पणयासेस-वर-फलय ! ॥ १० ॥ जय तव-लच्छि-सुसंगय ! ईसाइ व राइलच्छि-परिमुक्क ! । जय सिद्धत्थ-नरामर ! जय जय कोवाहि-वर-मंत ! ॥ ११ ॥ जय सिद्ध ! बुद्ध ! गुण-णिहि ! पसत्थ-कल्लाण-मंगलाययण ! । जय सिदयालु-महागुण ! पुरिसोत्तम-पुरिस-कय-पूय ! ॥ १२ ॥
