Book Title: Siribhuyansundarikaha
Author(s): Sinhsuri, Shilchandrasuri
Publisher: Prakrit Text Society Ahmedabad
View full book text
________________
७६७
सिरिभुयणसुंदरीकहा ॥
अहवा एसा होही मह सेन्ने रायदारिया का वि । तेण ममं पडिवज्जइ सरणं नियपक्खवाएण'. ।।८४०९।। एत्थंतरंमि हियए सल्लं व खुडुक्किया कुमारस्स । 'सिरिभुयणसुंदरी होज्ज किं नु इह आगया देवी ? ||८४१०।। अहवा कह मह होही एवंविहविमलपुन्नसंपत्ती ? । सा इह होही अहयं रक्खिस्सं निययजीयं व' ॥८४११।। इय जा चिंतइ कुमरो ता सो पयईए निग्घिणो पावो । दट्ठोठभिउडिभीमो विमुक्कगुरुघोरहुंकारो ॥८४१२।। केसेसु कड्डिऊणं जाव निवेसेइ कत्तियं कंठे । ता हक्किओ कवाली कुमरेण गहीरसद्देण ।।८४१३।। 'हा पाव ! पावचेट्ठिय ! अविसिट्ठ-विसिट्ठजणअद्द(द)ट्ठव्व! । किं तुमए पारद्धं चंडालाणं पि जमकिच्चं ? ॥८४१४।। कह न गओ सयखंडं ? अहव विलीणो सि किन्न एत्थेव ? । उत्तमजुयइवहज्झवसायपहावेण एण्हि पि ? ||८४१५।। एए वि किं न सडिया तुह हत्था पयइकक्कसा कूर! । जम(मि)मीए केसपासे हढकड्डणकज्जवावरिया ? ॥८४१६।। गोरिं स(सु)कुमारंगिं गुरुमहिहररायसंभवं देविं । हा पाव ! पव्वई पिव जयपुज्जं कह णु मारेसि ?' ||८४१७।। एत्थंतरंमि सहसा कुमरं अवलोइऊण सा बाला । संजीविय व्व सरणं पडिवन्ना भणिउमाढत्ता ॥८४१८।। 'हा निक्कारणवच्छल! रक्ख ममं रक्ख मरणभयभीयं । कावालियाओ निग्घिणकम्मरयाओ जम्मा(मा)ओ व्व ।।८४१९।।
Jain Education International
For Private & Personal Use Only
www.jainelibrary.org
Page Navigation
1 ... 774 775 776 777 778 779 780 781 782 783 784 785 786 787 788 789 790 791 792 793 794 795 796 797 798 799 800 801 802 803 804 805 806 807 808 809 810 811 812 813 814 815 816 817 818 819 820 821 822 823 824 825 826 827 828 829 830 831 832 833 834 835 836 837 838