Siribhuyansundarikaha

Author(s): Sinhsuri, Shilchandrasuri
Publisher: Prakrit Text Society Ahmedabad

Page 815

८०६
सिरिभुयणसुंदरीकहा ॥
तो भणइ मुणी 'सच्चं उवेक्खणीओ हु निग्गुणो अ ( 5 ) वस्सं । सगुणं च उवेक्खंतो अनंतसंसारिओ होइ ||८८३७|| चउवीसजोयणाडविपुव्वावर - दक्खिणुत्तरमेण ।
सव्वो वि सावयगणो सगुण च्चिय मज्झ संगेण ||८८३८ || एएण कारणं भणामि काऊण भरवसमिमस्स । मा मारसु मयरायं अकारणं पल्लिवरनाह! ||८८३९ ।। जइ पल्लिनाह! सीहो होइ न सदओ तुहोवरिं ता किं । कमवडिओ कह छुट्टसि इमस्स पयईए धीरस्स ? || ८८४० ॥ तुह वग्घराय ! दिढभल्लिघायभीओ त्ति एस ओसरिओ । मा एवं कुणसु मणे किं तु दयापरवसो ल्हसिओ ||८८४१ | सीहम्मि तुमं ढुको कोहग्गपरव्वसो वहनिमित्तं । एसो उ हणंतंमि वि तुमंमि कारुन्नमुव्वहइ ||८८४२ || कोहो हि नाम नरवर ! निरं (रिं) धणो एस होइ हव्ववहो । अग्गह- भूय- पिसायं कोह च्चिय परवसत्तमिणं ||८८४३ || अंधत्तणं एस सलोयणं पि कोहो तमं ससूरंपि । कोहो चेव य कंपो सीयज्जरवज्जिओ होइ ||८८४४ || कोहो चेव पलावो अकारणो नरयसत्थवाहो य । तं किं न जं न कोहो अवयारपरंपराहेऊ ? ।। ८८४५ ।। गुणरयणभूसणाई कोहो चोरो व्व तक्खण च्चेव । निलू (ल्लू) डिऊण पुरिसं विडंबए लोयमज्झमि ||८८४६ || भंडो व्व होइ कोहो संगं जो कुणइ तेण सो वि तहा । परिचत्तलज्जवसणो असम्भवयणाई भासेइ ||८८४७ ||