Siribhuyansundarikaha

Author(s): Sinhsuri, Shilchandrasuri
Publisher: Prakrit Text Society Ahmedabad

Page 819

८१०
सिरिभुयणसुंदरीकहा ॥ तो अवहिनाणजाणियपुव्वभवुप्पन्नपरमनेहभरा । चइऊणं उववन्ना एत्थेव य भारहे वासे ।।८८८१।। तो भुयणसुंदरि ! तुमं मायापच्चइयकम्मदोसेण । सिरिरायगिहे नयरे वेसाकुच्छीए उप्पन्ना ।।८८८२॥ अणंगसिरीनामाए महिंदपालस्स वारविलयाए । जायाऽऽसि तुमं धूया नामेणं मयणमंजूसा ।।८८८३।। जो उण महिंदपालो सो जीवो आसि सीहदेवस्स । जो उण सुमई मंती सो भिल्लमुणिस्स किर जीवो ||८८८४।। अह पुव्वभवंतरगुरुसिणेहभावेण सुमइवरमंती । अणुरत्तो तुह उवरिं मयणमंजूसजम्मंमि ।।८८८५।। चंदसिरीजीवो उण महिंदलच्छि त्ति आसि तंमि भवे । तस्स तुमं संपत्ता सहित्तणं जीवियब्भहियं ।।८८८६।। पुण तंमि भवे सुंदरि ! महिंदलच्छीए संगसंबुद्धा । पालियजिणिंदधम्मा मरिऊण गयाऽऽसि सुरलोयं ।।८८८७।। राया महिंदपालो सुमई वि य इंददत्तनिच्छूढा । संसारविरत्तमणा पेरंते मुणिवरा जाया ॥८८८८।। मरिऊणं बंभलोए उववन्नाइं च तत्थ समकालं । सुमई महिंदपालो तुमं च जा मयणमंजूसा ।।८८८९।। तत्तो कोसंबीए अणंतसेणस्स देवदत्ताए । दोन्नि वि जाया पुत्ता तुमं च भइणी समुप्पन्ना ।।८८९०।। वर-भरह-बालचंदा कमेण नामाइं तुम्ह जायाई । जिणधम्मपहावेणं गयाइं दो लंतयं कप्पं ।।८८९१।।