Kutchhma Jain Sanskriti Ek Drushtipat

Author(s): Nita Thakar
Publisher: Nita Animesh Thakar

Page 9

ગણાય. આથી કેટલીક વિગતો અહીં રહી જતી લાગે તો તે ક્ષમ્ય જ ગણાવું જોઈએ. કુકમામાં સ્થાપિત શ્રીમદ્ રાજચંદ્ર સાધના કેન્દ્ર, દેવપર-યક્ષ પાસે નિર્માણાધીન પાર્શ્વવલ્લભ ઈન્દ્રધામ જેવાં જૈન કેન્દ્રો, કચ્છમાં અને કચ્છ બહાર કચ્છી જૈનો દ્વારા ચલાવાતા કચ્છી ભવનો, અનેક સખાવતી પ્રવૃત્તિઓ, ડગારા જેવા ગામમાંથી દીક્ષિત થયેલ આયર જ્ઞાતિના સાધ્વીઓ – આવું કેટલુંક અહીં નોંધાયું ન હોય તો તેમાં કોઈ આશ્ચર્ય નથી. દૂરથી ધ્યાન ખેંચે એવા ચળકતાં શિખરોની છબી ફ્રેમમાં મઢીને જાણે અહીં મૂકાઈ છે. પાસે જઈએ ત્યારે જ પરખાય એવી ઝીણી કોણી જેવી વિગતો આમાં ન જોવા મળે તો તે સ્વાભાવિક જ ગણાય. દેરાસરો અને તીર્થોમાં બે-ચાર પેઢીથી ગાયન-વાદનનું કાર્ય કરતા મુસલમાન ગાયક-લંઘા-ઢોલી, દેરાસરો અને મહાજનોની સંસ્થાઓમાં સેવા બજાવતા પૂજારી, મહેતાજી, પટાવાળા વગેરે સાથે સંઘની નાની-મોટી વ્યક્તિઓના મીઠા સંબંધો, સ્થાનક-ઉપાશ્રયમાં તપ-જપ-સત્સંગનો હોંશથી લાભ લેતા ગરાસિયા-બ્રાહ્મણ-પટેલ-આયર-હરિજનો, શંકરમંદિર કે ઠાકરમંદિર કે પીર કે જખડાડાના મંદિરોના નિર્માણ-જીર્ણોદ્ધારમાં પ્રેમથી ફાળો નોંધાવતા જૈન શ્રેષ્ઠીઓ – જૈન ભાવના અને જૈન સંસ્કારોએ કચ્છની ‘બાંધણી'માં પૂરેલા આ રંગો તો નિકટ પરિચયે પરખાય એવા છે. અભ્યાસનિષ્ઠા અને ગુણાનુરાગમાંથી સર્જાયેલું આ પુસ્તક કચ્છમાં જૈન ધર્મનું વિરાટ દર્શન કરાવશે અને સાથે સાથે, ઉપર કહ્યું તેવું નિકટ દર્શન કરવાની ઉત્કંઠા વાચકમાં જગાડશે એવી આશા જરૂર રાખી શકાય.
ડૉ. નીતાબહેનની સાહિત્ય સેવા, કચ્છ સેવા અને ધર્મસેવાનું હાર્દિક અભિવાદન કરું છું ને આવા સ્થાયી મૂલ્યવાળાં સાહિત્યનું સર્જન તેમના હાથે થતું રહે એવી મંગળકામના પાઠવું છું. નાના ભાડિયા
- ઉપા. ભુવનચંદ્ર સં. ૨૦૬૧, આસો સુદ ૭,
“ચિન્મય' તા.૧૦-૧૦-૦૫