________________
૧૦
કાશીમાં પદાર્પણ
કમચ્છા આવ્યા એટલે જાણે સમુદ્ર પાર કરીને સામે કિનારે પહોંચી ગયા હોઈએ તેવો આફ્લાદ મુનિશ્રી અનુભવી રહ્યા હતા. શ્રીયુત મોહનભાઈએ કમચ્છામાં વિશેષરૂપે પ્રવચનની વ્યવસ્થા કરી હતી. શ્રી જયંતમુનિજીની ઉંમર હજુ નાની હતી અને વિહાર ઉપરાંત વ્યાખ્યાનમાં પણ સજાગ રહી, સચોટ સમજાવટથી તેઓ સમાજ ઉપર ઊંડી છાપ પાડતા હતા. લોકોનું ધર્મ પ્રત્યેનું આકર્ષણ વધતું હતું. પૂ. તપસ્વી મહારાજ પોતાની તળપદી શૈલીમાં, ગુજરાતી ભાષામાં ટુચકા સંભળાવી, સૌના હૃદયમાં વાત આરપાર ઊતરી જાય તે રીતે ઉપદેશ આપતા હતા. કમચ્છામાં એક દિવસ મુકામ થયો. કમચ્છાથી વિહાર કરી, મુખ્ય વારાણસીના મધ્યભાગમાં બી. બી. હટિયા નામના મહોલ્લામાં પદાર્પણ કરવાનું હતું.
૧૯૪૯ની પાંચમી માર્ચના રોજ બી. બી. હટિયાના મકાનમાં પગ મૂકવાની સાથે જ કાશીનગરીમાં મંગલમય પ્રવેશ થઈ ચૂક્યો. હવે મુનિજીઓને હાશ !” કરીને બેસવાનો વારો આવ્યો! - વારાણસી સમાજમાં આત્મારામભાઈ જૈન ન હોવા છતાં જૈન સાધુની ભક્તિમાં ઊંડો રસ ધરાવતા હતા. તેમને જૈન ભાઈઓ સાથે ખૂબ જ સારો સંબંધ હતો. આત્મારામભાઈ પોતે આનંદી સ્વભાવના, મિલનસાર અને સુખી સંપન્ન વ્યક્તિ હતા. આપણા સમાજના અગ્રસરો તેને ખૂબ જ માન આપતા. મુનિઓના રહેવા માટે બી. બી. હટિયાનું મકાન આત્મારામભાઈએ જ શોધી આપ્યું હતું.
