________________
ચાતુર્માસની ઉપલબ્ધિઓ
કાઠમંડુ નેપાળ જૈન પરિષદે તેમનું પુનઃ હાર્દિક સ્વાગત કર્યું. મુનિશ્રી બાગમતીના કિનારે ગોલછાના રાજભવનમાં ચાતુર્માસ માટે સ્થિર થયા.
પર્યુષણ પર્વ દરમિયાન આઠ દિવસ જ્ઞાનમંદિરમાં રહેવાનું નક્કી થયું. સમગ્ર તેરાપંથી સમાજ, દિગંબર સમાજ, મૂર્તિપૂજક સમાજ અને સ્થાનકવાસી ભાઈ-બહેનો એકત્ર થયાં. પર્યુષણ સારી રીતે ચાલતાં હતાં. કાઠમંડુમાં ચોથમલજી જટિયા એક મોટા ઉદ્યોગપતિ છે. તેમનાં પત્ની શ્રીમતી પુષ્પાબહેન જૈન પરિવારનાં હતાં. તેઓ પર્યુષણ સમયે તેમના પતિ સાથે દર્શનાર્થે આવ્યાં ત્યારે મુનિશ્રીનું પ્રવચન ચાલતું હતું. તેમણે કાઠમંડુ સમાજને તીવ્ર ઉપદેશ આપતાં કહ્યું કે “કાઠમંડુ ક્ષેત્રમાં આટલા સુખી-સંપન્ન જૈન પરિવારો હોવા છતાં જૈનોનું એક પણ સ્થાનક નથી, તેમ જ કોઈ જૈન મંદિર પણ નથી. આપણા માટે આ લજ્જાની વાત છે.
નેપાળમાં ભદ્રાબાહુસ્વામીએ બાર વર્ષ સુધી તપસ્યા કરી હતી. ભૂતકાળમાં ભારતથી ઘણા સંતો નેપાળની ભૂમિને પાવન કરી ગયા છે. મલ્લિનાથ ભગવાનનું જન્મનકલ્યાણક નેપાળની મિથિલા નગરીમાં હતું. આજે જૈનોની પોતાની કોઈ ઓળખ નથી. અમો આટલો લાંબો વિહાર કરીને કાઠમંડુ આવ્યાં છીએ. આ યાત્રા ત્યારે જ સફળ થઈ ગણાય કે જ્યારે તમે કોઈ સમાજહિતનું નક્કર કાર્ય કરો. અમે ફક્ત કાઠમંડુનાં આહાર-પાણી લેવા માટે અહીં સુધી નથી આવ્યાં. કાઠમંડુમાં જૈન સમાજનો ઇતિહાસ સર્જાય તેવું ઇચ્છીએ છીએ. આજે સમગ્ર જૈન સમાજની ઉપસ્થિતિ છે. આવી સભા હવે ફરીથી મળવી મુશ્કેલ છે. તો આજની સભામાં નક્કર કામ થવું જોઈએ.”
