________________
સમેતશિખર તરફ પ્રયાણ
ઝરિયાનાં પચાસ શ્રાવક-શ્રાવિકાઓ વિહારમાં સાથ આપી રહ્યાં હતાં. કલકત્તાના પણ કેટલાક શ્રાવકો સાથે હતા. શ્રાવકોએ એક ટ્રક અને એક ગાડીની વ્યવસ્થા ગોઠવી હતી. કલકત્તાથી રસોઇયા બોલાવ્યા હતા. પૂજ્ય તપસ્વીજી મહારાજ આગળ ચાલતા અને તેમના નિયમ પ્રમાણે સામે સ્ટેશન પહોંચ્યા પહેલાં કશું વાપરતા નહીં. જ્યારે જયંતમુનિ મેલ ટ્રેનને આગળ જવા દેતા અને પોતાની લોકલ ગાડી પાછળ ચલાવતા અને જ્યાં-ત્યાં સ્ટેશન કરી, નાસ્તો-પાણી કરી આગળ વધતા. વિહારીઓના નાસ્તા માટે જ્યાં પડાવ પડતો ત્યાં મંગળમય વાતાવરણ બની જતું. આગંતુક બાળકો તથા ગ્રામજનોને પ્રસાદ આપવામાં આવતો.
માણસો ખૂબ જ શ્રદ્ધાપૂર્વક મુનિ મહારાજોને વંદન કરવા માટે ધસી આવતા. વિહાર ઘણો સાતાપૂર્વક થઈ રહ્યો હતો. વચ્ચે રજોડીનું મોટું જંગલ પાર કર્યા પછી કોડરમા આવે છે. કોડરમા અબરખનું સેંટર છે. આસપાસ અબરખની અનેક ખાણ છે. પૂરો પ્રદેશ અબરખની ખાણોથી ઉદ્યોગમય બની ગયો છે અને હજારો માણસોને રોજી-રોટી આપે છે.
કોડરમાં પહોંચતા પહેલાં એક આનંદમય ઉત્સવનું આયોજન થઈ ગયું. સૌરાષ્ટ્ર નિવાસી ભાઈશ્રી રતિલાલભાઈ પોતાના પરિવાર સાથે વરસોથી કોડરમામાં વસ્યા હતા અને એક અબરખની ખાણ ચલાવતા હતા. કોડરમાથી વીસ કિલોમીટર દૂર, રજોડીના જંગલ તરફ રતિભાઈની ખાણ હતી. તેમને સમાચાર મળ્યા કે પૂજ્ય મુનિવરો રાજગિરિ અને પાવાપુરી થઈને
