________________
વિશાળ મકાન બનાવ્યાં અને તેના કેંદ્રમાં એક જૈન સ્થાનક બનાવ્યું. જૈન મંદિર અને જૈન સ્થાનકથી ઓશવાળ સંઘ દેદીપ્યમાન બન્યો. કેટલાક તેરાપંથી ઓશવાળ પણ હતા. મંદિરનો પ્રસંગ હોય કે સ્થાનકનો હોય, સૌ મળીને બધા પ્રસંગો એકસાથે જ ઊજવતા. શ્રીયુત ભાઈચંદભાઈ પંચમિયાએ ઓસવાળ ભાઈઓની ઉન્નતિમાં ઊંડો રસ લીધો હતો અને તેઓને આગળ વધવામાં ઘણો જ યોગ આપ્યો હતો. આજે પણ તેઓ ભાઈચંદભાઈનો ઘણો જ ઉપકાર માને છે.
જમશેદપુરની ક્ષેત્રસ્પર્શના વખતે ત્રણ ઉપાશ્રયના પાયા પડી ગયા હતા અને આગળ ચાલી ત્રણે સંઘોએ ઘણી સારી ઉન્નતિ કરી. પૂજ્ય મુનિવરો પ્રત્યે જમશેદપુરના શ્રાવકોની અગાધ શ્રદ્ધા બંધાઈ અને અત્યાર સુધી એકધારો પ્રેમ જાળવી રાખ્યો છે. સમગ્ર ગુજરાતી સમાજનો પણ એટલો જ સ્નેહ છે. શ્રી જયંતમુનિજી પ્રત્યેક મારવાડી અને ગુજરાતી ઘરમાં ગોચરી માટે પગલાં કરતાં અને કશાય સાંપ્રદાયિક ભેદભાવ વિના પરસ્પર પ્રેમ અને એકત્વનો ઉપદેશ આપતા.
એક ભાઈ રોજની બે ડબ્બા સિગારેટ પીતા હતા. પૂ. તપસ્વીજી મહારાજે તેનું બંધાણ છોડાવ્યું, તેથી તેઓ રોગથી પણ મુક્ત થયા અને ધનસંપત્તિમાં પણ સમૃદ્ધ બન્યા. તેઓ પૂજ્ય તપસ્વીજી મહારાજનો ઊંડો ઉપકાર માનતા હતા. સિગારેટનો જે ખર્ચો થતો તે બધી ધનરાશિ વિધવા બહેનોની સહાયતામાં વાપરવાનો તેમણે નિશ્ચય કર્યો હતો.
અમરેલી નિવાસી અને મોઢ વણિક શ્રી વલ્લભબાપા પરીખ અને તેનો પરિવાર પૂરા સમાજ સાથે ખૂબ ભળેલા હતા. તેઓએ ઘણી ભક્તિ કરી. આ પરિવારમાં નગીનભાઈ પરીખ ખૂબ નામાંક્તિ ઉદ્યોગપતિ થયા. નગીનભાઈ આજે પણ પોતાનાં બે અંગત વિમાન રાખે છે. નગીનભાઈનો શ્રી જયંતમુનિજી પ્રત્યે ઘણો સ્નેહ હતો. તેમનાં માતુશ્રી કમળાબહેન પરીખ ઘણાં ગુણી અને સત્સંગી મહિલા હતાં. આ જ રીતે ટાંક પરિવાર પણ વિશાળ વટવૃક્ષ જેવો ફેલાયેલો હતો. તેમના પરિવારમાં શામજીભાઈ ટાંક પણ એવા જ નામાંકિત વ્યક્તિ થયા. વર્ષ સુધી સમાજના પ્રમુખ રહી તેઓએ અપૂર્વ સેવા બજાવી. આમ જમશેદપુરમાં ઊંડી લાગણી બંધાણી.
ધાતકિડીહના ઉદાણી પરિવાર તથા કંદોઈ મહાજનને ત્યાં પણ મુનિશ્રીએ પગલાં કર્યા. દલીચંદભાઈ ઉદાણી તથા તારાચંદભાઈ ઉદાણીના પરિવાર જૈન ધર્મના રંગે રંગાયેલા હતા. આગળ જતા દલીચંદભાઈ ઉદાણી પરિવારે શ્રીસંઘની અપૂર્વ સેવા બજાવી છે.
ગોલમૂડી પણ જમશેદપુરનો એક વિસ્તાર છે. અહીં ભાઈચંદભાઈ પંચમિયાના મોટાભાઈ ડાહ્યાભાઈ પંચમિયા વર્ષો પૂર્વે વસ્યા હતા અને સારી નામના મેળવી હતી. મુનિરાજો જ્યારે પધાર્યા ત્યારે ડાહ્યાભાઈનો સ્વર્ગવાસ થઈ ગયો હતો. પરંતુ સાંકળીબહેન સાથે તેના પુત્ર બળવંતભાઈ અને ધરમચંદભાઈ સંતોની ભક્તિમાં તત્પર રહેતા. તેઓ ઘરમાં દૂઝણાં રાખી શુદ્ધ દૂધ-દહીંનો ઉપભોગ કરી શકતા હતા. તેઓએ પૂજ્ય તપસ્વી મહારાજને ગોલમૂડી પધારવા માટે ખાસ વિનંતી
સાધુતાનું શિખર અને માનવતાની મહેંક 240
