________________
અવલંબનરૂપ કોઈ પણ વસ્તુ કોઈ પણ કાળે હોવી સંભવી શકતી નથી, સંભવી શકે જ નહીં.
આશાતના ટાળવી જોઈએ, આશાતના થવા ન દેવી જોઇએ, ભગવાનની પૂજા કરતાં આશાતના ન કરવી, “આશાતના કરીને પૂજા કરવા કરતાં પૂજા ન કરવી સારી” આવું કોઈ વાક્ય શાસ્ત્રમાં મળે, તો તેનો આશય પૂજા બંધ કરવાનો નથી પરંતુ આશાતના ટાળવા માટે ભાર દેવાનો છે. પૂજા કરતાં કોઈ સૂક્ષ્મ આશાતનાઓ થાય, તે ટળી ન શકે, તેટલા ખાતર પૂજા અટકાવાય નહીં.
પૂજા ન કરવી એજ મોટી આશાતના છે. અનારાધક ભાવ એજ આશાતના છે. તેવીજ રીતે આશાતનાના ભયથી પ્રતિમા ન ભરાવવી એ વ્યાજબી નથી.
મંદિરો અને પ્રતિમાઓ દ્વારા શ્રી તીર્થકરોની આરાધના માટેની આ ભાવનાને કારણે જૈનો કે જૈન સંઘો અને વિહારમાં જૈન મુનિઓ રસ્તામાં આવતા કોઈપણ સ્થળના જૈન મંદિરને દર્શન કર્યા વિના ઓળંગતા નથી.
એટલું જ નહીં, પરંતુ આગમસૂત્રો સાંભળતી વખતે પણ જ્યારે જ્યારે એ કલ્યાણશાળી મહાત્માઓના નામોચ્ચારો સાંભળવામાં આવે ત્યારે તેને પણ સત્કારે છે. તેમના કલ્યાણકારક પ્રસંગો સાંભળવામાં આવે તેનોય ઉત્સવ કરે છે.
તીર્થંકર પરમાત્માઓના દર્શનથી પ્રજા વંચિત ન રહે એવા ઉદ્દેશોથી મોટા મોટા તીર્થો બાંધવામાં આવે છે. મોટા મોટા યાત્રાગમન સમારંભો, રથોત્સવો, મહાપૂજાઓ અને એવી બીજી ઘણી ઉત્સાહજનક પ્રવૃત્તિઓ કરાય છે. તીર્થકરો તરફ પ્રજાના મનનું વલણ જાગૃત કરવા અને રાખવા આ પ્રયત્નો કરવામાં આવે છે.
