Agam 45 Chulika 02 Anuyogdwar Sutra Part 02

Author(s): Aryarakshit, Jambuvijay
Publisher: Mahavir Jain Vidyalay

Page 493

श्री अनुयोगद्वारसूत्रस्य द्वितीयविभागस्य एपमं परिशिष्टम् (३)
एवज्जिय अवसेसे खेत्ते गहिऊण पदरपरिमाणं । पुव्वं पिव कादूर्ण बहलं बहलम्मि मेलिज्जो ॥१४६।। एवमवसेसखेत्तं जाव समप्पेदि ताव घेत्तव्वं । एक्केक्कपदरमाणं एक्केक्कपदेसबहलेणं ॥१४७।। एदेणं पयारेणं णिप्पण्णत्तिलोयखेत्तदीहत्तं । वासउदयं भणामो णिस्संदं दिट्ठिवादादो ॥१४८॥ सेढिपमाणायामं भागेसु दक्खिणुत्तरेसु पुढं । पुव्वावरेसु वासं भूमिमुहे सत्त येक्कपंचेक्का ॥१४९॥ चोइसरजुपमाणो उच्छेहो होदि सयललोगस्स । अद्धमुरज्जस्सुदवो समग्गमुरवोदयसरिच्छो ॥१५०॥ हेट्ठिममज्झिमउवरिमलोउच्छेहो कमेण रज्जूवो । सत्त य जोयणलक्खं जोयणलक्खूणसगरज्जू ।।१५१।। इह रयणसक्करावालुपंकधूमतममहातमादिपहा । मुरवद्धम्मि महीओ सत्त च्चिय रज्जुअन्तरिया ॥१५२॥ घम्मावंसामेघाअंजणरिट्ठाणउब्भमघवीओ । माघविया इय ताणं पुढवीणं गोत्तणामाणि ॥१५३॥ मज्झिमजगस्स हेट्ठिमभागादो णिग्गदो पढमरजू । सक्करपहपुढवीए हेट्ठिमभागम्मि णिट्ठादि ॥१५४ ॥ तत्तो दोइदरजू वालुवपहहेट्ठि समप्पेदि । तह य तइज्जा रज्जू पंकपहहेट्ठस्स भागम्मि ॥१५५।। धूमपहाए हेट्ठिमभागम्मि समप्पदे तुरियरज्जू । तह पंचमिया रजू तमप्पहाहेट्ठिमपएसे ॥१५६।। महतमहेट्ठिमयंते छट्ठी हि समप्पदे रज्जू । तत्तो सत्तमरजू लोयस्स तलम्मि णिठ्ठादि ॥१५७।। मज्झिमजगस्स उवरिमभागादु दिवड्डरज्जुपरिमाणं । इगिजोयणलक्खूणं सोहम्मविमाणधयदंडे ॥१५८॥ वच्चदि दिवड्डरजू माहिंदसणक्कुमारउवरिम्मि । णिठ्ठादि अद्धरज्जू बंभुत्तरउवभागम्मि ॥१५९।। अवसादि अद्धरज्जू काविट्ठस्सोवरिट्ठभागम्मि । स च्चिय महसुक्कोवरि सहसारोवरि अ स च्वेय ॥१६०॥ तत्तो य अद्धरज्जू आणदकप्पस्स उवरिमपएसे । स य आरणस्स कप्पस्स उवरिमभागम्मि गेविज ॥१६१।। तत्तो उवरिमभागे णवाणुत्तरओ होंति एक्करज्जूवो । एवं उवरिमलोए रज्जुविभागो समुद्दिढे ॥१६२॥ णियणियचरिमिंदयधयदंडग्गं कप्पभूमिअवसाणं । कप्पादीदमहीए विच्छेदो लोयविच्छेदो ॥१६३|| सेढीए सत्तंसो हेट्ठिमलोयस्स होदि मुहवासो । भूमिवासो सेढीमेत्ताअवसाणउच्छेहो ॥१६४॥ मुहभूमिसमासमद्धिय गुणिदं पुण तह य वेदेण । घणघणिदं णादव्वं वेत्तासणसण्णिए खेत्ते ॥१६५।। हेट्ठिमलोए लोओ चउगुणिसगहिदो विंदफलं । तस्सद्धे सयलजुगो दोगुणिदो सत्तपरिभागो ॥१६६।। छेतूणं तसणालिं अण्णत्थं ठाविदूण विंदफलं । आणेज तप्पमाणं उणवण्णेहिं विभत्तलोयसमं ॥१६७।। सगवीसगुणिदलोओ उणवण्णहिदो असेसखिदिसंखा । तसखित्ते सम्मिलिदे चउगुणिदो सगहिदो लोओ॥१६८।। मुरजायारं उड्डे खेत्तं छेत्तूण मेलिदं सयलं । पुव्वावरेण जायदि वेत्तासणसरिससंठाणं ॥१६९॥ सेढीए सत्तमभागो उवरिमलोयस्स होदि मुहवासो । पणगुणिदो तब्भूमी उस्सेहो तस्स इगिसेढी ॥१७०॥ तियगुणिदो सत्तहिदो उवरिमलोयस्स घणफलं लोओ । तस्सद्धे खेत्तफलं तिउणो चोद्दसहिदो लोओ ॥१७१।। छेत्तूणं तसणालिं अण्णत्थं ठाविऊण विंदफलं । आणेज्ज तं पमाणं उणवण्णेहिं विभत्तलोयसमं ॥१७२।। विंसदिगुणिदो लोओ उणवण्णहिदो य सेसखिदिसंखा । तसखेते सम्मिलिदे लोओ तिगुणो अ सत्तहिदो॥१७३॥ घणफलमुवरिमहेट्ठिमलोयाणं मेलिदम्मि सेढिघणं । वित्थररुइबोहत्थं वोच्छं णाणावियप्पे वि ॥१७४॥ सेढियसत्तमभागो हेट्ठिमलोयस्स होदि मुहवासो । भूवित्थारो सेढी सेढि त्ति य तस्स उच्छेहो ॥१७५।। भूमिय मुहं विसोहिय उच्छेहहिदं मुहाउ भूमीदो । सव्वेसु क्खेत्तेसुं पत्तेक्कं वडिहाणीओ ॥१७६॥ तक्खयवड्डिपमाणं णियणियउदयाहदं जइच्छाए । हीणब्भहिए संते वासाणि हवंति भूमुहाहिंतो ॥१७७॥