Prakrit Path Chayanika Ucchatar Pathyakram

Author(s): B L Institute of Indology
Publisher: B L Institute of Indology

Page 73

उवासगदसाओ पढमं आणन्दज्झयणं तेणं कालेणं तेणं समएणं चम्पा नामं नयरी होत्था वण्णओ। पुण्णभद्दे चेइए। वण्णओ॥१॥ तेणं कालेणं तेणं समएणं अज्जसुहम्मे समोसरिए जाव जम्बू पज्जुवासमाणे एवं वयासी। "जइ णं, भन्ते, समणेणं भगवया महावीरेणं जाव संपत्तेणं छट्ठस्स अङ्गस्स नायाधम्मकहाणं अयम? पण्णत्ते, सत्तमस्स णं, भन्ते, अङ्गस्स उवासगदसाणं समणेणं जाव संपत्तेणं के अटे पण्णत्ते?" / एवं खलु, जम्बू, समणेणं जाव संपत्तेणं सत्तमस्स अङ्गस्स उवासगदसाणं दस अज्झयणा पण्णत्ता। तं जहा। आणन्दे॥१॥ कामदेवे य॥२॥ गाहावइचुलणीपिया॥३॥ सुरादेवे॥४॥चुल्लसयए॥५॥गाहावइ-कुण्डकोलिए॥६॥सद्दालपुत्ते॥७॥ महासयए॥८॥ नन्दिणीपिया॥९॥ सालिहीपिया॥१०॥ "जइ णं, भन्ते, समणेणं जाव संपत्तेणं सत्तमस्स अङ्गस्स उवासगदसाणं दस अज्झयणा पण्णत्ता, पढमस्स णं, भन्ते समणेणं जाव संपत्तेणं के अटे पण्णत्ते?"॥२॥ एवं खलु, जम्बू, तेणं कालेणं तेणं समएणं वाणियगामे नामं नयरे होत्था। वण्णओ॥ तस्स वाणियगामस्स नयरस्स बहिया उत्तरपुरत्थिमे दिसीभाए दूइपलासए नामं चेइए॥ तत्थ णं वाणियगामे नयरे जियसत्तू नाम राया होत्था। वण्णओ॥ तत्थ णं वाणियगामे आणन्दे नाम गाहावई परिवसइ, अड्डे जाव अपरिभूए॥३॥ तस्स णं आणन्दस्स गाहावइस्स चत्तारि हिरण्णकोडीओ निहाणपउत्ताओ, चत्तारि