Prakrit Path Chayanika Ucchatar Pathyakram

Author(s): B L Institute of Indology
Publisher: B L Institute of Indology

Page 95

मूलदेव कहा 893 सम्पत्ता भूमिघरं। चोरो तं दव्वं णिहणिउं आरद्धो। भणिया य णेण भगिणी, एयस्स पाहुणयस्स पाय सोयं देहि! ताए कूव-तड-सन्निविटे आसणे णिवेसिआ। ताए पाय-सोय-लक्खेण पाओ गहिओ कूवे छुहामि त्ति। जाव अतीव-सुकुमारा पाया, ताए णायं जहेस कोइ अणुभूय-पुव्व-रज्जो विहलियंगो। तीए अणुकम्पा जाया। तओ ताए पाय-तले सण्णिओ, णस्स त्ति मा मारिज्जिहिसि त्ति। पच्छा सो पलाओ। ताए वोलो कओ; णट्ठो णट्ठो त्ति। सोयसिं कड्डिऊण मग्गे ओलग्गो। ___मूलदेवो राय-पहे अइसन्निकिट्ठ णाऊण चच्चर-सिवन्तरिओ ठिओ। चोरो तं सिवलिङ्गं एस पुरिसो त्ति काउं कंकमएण असिणा दुहा-काउं पडिनियत्तो गओ भूमिघरं। तत्थ वसिऊण पहायाए रयणीए तओ निग्गन्तूण गओ वाहि। अन्तरावणे तुण्णागत्तं करेइ। ___ राइणा पुरिसेहिं सद्दाविओ। तेण चिन्तियं जहा, सो पुरिसो णूणं ण मारिओ, अवस्सं च एस राया भविस्सइ त्ति। तेहिं पुरिसेहि-आणिओ। राइणा अब्भुट्ठाणेण पूइओ आसणे णिवेसाविओ, सु-वहं च पियं आभासिओ संलत्तो, मम भगिणिं देहि त्ति। तेण दिण्णा, विवाहिया राइणा। भोगा य से संपदत्ता। कइसुवि दिणेसु गएसु राइणा मण्डिओ भणिओ, दव्वेण कज्ज त्ति। तेण सु-वहुं दव्व-जायं दिण्णं। राइणा संपूजिओ। अण्णया पुणो मग्गिओ, पुणो वि दिण्णं। तस्स य चोरस्स अतीव सक्कार-सम्माणं पउञ्जइ। एएण पगारेण सव्वं दव्वं दवाविओ। भगिणिं से पुच्छइ; तीए भण्णति, एत्तियं चेव वित्तं। तओ पुव्वावेइय-लेक्खाणुसारेण सव्वं दव्वं दवावेऊण मण्डिओ सूलाए आरोविओ।