Prakrit Path Chayanika Ucchatar Pathyakram

Author(s): B L Institute of Indology
Publisher: B L Institute of Indology

Page 94

219 मूलदेव कहा मण्डियचोरो वेण्णाडये णयरे मण्डिओ णाम तुण्णाओ पर-दव्व हरण-पसत्तो आसी। सो य दुट्ठ-गण्डो मि त्ति जणे पगासेन्तो जाणु-देसेण णिच्चं एव अद्दावलेव-लित्तेण बद्ध-वण-पट्टो राय-मग्गे तुण्णाग-सिप्पं उवजीवइ। चक्कमन्तो वि य दण्ड-धरिएणं पाएणं किलिम्मन्तो कहंचि चक्कमइ। रत्तिं च खत्तं खणिऊण दव्वजायं घेत्तूण नगर-सण्णिहिए उज्जाणेग-देसे भूमि-घरं तत्थ निक्खिवइ। तत्थ य से भगिणी कण्णगा चिट्ठइ। तस्स भूमि-घरस्स मज्झे कूवो। जं च सो चोरो दव्वेण पलोभेउं सहायं दव्व-वोढारं आणेइ, तं सा से भगिणी अगड-समीवे पुव्वनत्थासणे णिवेसिउं पाय-सोय-लक्खेण पाए गेण्हिऊण तंमि कूवए पक्खिवइ। तओ सो विवज्जइ। एवं कालो वच्चइ णयरं मुसन्तस्स। चोर-ग्गाहा तं ण सक्केन्ति। गेण्हिउं। तओ णयरे बहुरवो जाओ। तत्थ य मूलदेवो राया पुव्वभणिय-विहाणेण जाओ। कहिओ य तस्स पउरेहिं तक्कर-वइयरो जहा, एत्थ णयरे पभूय-कालो मुसन्तस्स वट्टइ कस्सइ तक्करस्स, ण य तीरइ केणइ गेण्हिउं। ता करेउ किंपि उवायं। ताहे सो अन्नं नगरारक्खियं ठवेइ, सो वि ण सक्कइ चोरं गेण्हिउं। ताहे मूलदेवो सयं नीलपडं पाउणिऊण रत्तिं णिग्गतो। मूलदेवो अणज्जन्तो एगाए सभाए णिवण्णो अच्छइ जाव, सो मण्डिय-चोरो आगन्तुं भणइ, को एत्थ अच्छइ? मूलदेवेण भणियं, अहं कप्पडिओ। तेण भण्णइ, एहि, मणूसं करेमि। मूलदेवो उढिओ। एगमि ईसर-घरे खत्तं खयं। सुवहुं दव्व-जायं णीणेऊण मूलदेवस्स उवरिं चडावियं। पयट्टा णयरवाहिरियं। मूलदेवो पुरओ चोरो असिणा कड्डिएण पिट्ठओ एइ।