Kahavali Pratham Paricched Part 02

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 282

[२६५]
"कि मज्झ जीविएणं, रज्जेण वि? जइ इमाए सह भोए ।
सुरसुंदरिसरिसाए, सुरयपराए न भुंजामि' || तओ संजायवम्महेण पट्टविया दूई । साहिओ नरिंदाभिप्पाओ । तीए भणियं - 'अम(लं?) पापकहाए । परिहरिओ एस मग्गो खुद्दसत्तेहिं पि' । तओ पुणो पुणो मन्नाविज्जंतीए अवियप्पं भणियमणाए - 'हला दूइ ! ए[स] किं भाउणो वि न लज्जए राया ?' तं च सोऊण रण्णा वावाइओ रट्ठवद्धणो । पुणो भणावियं - 'संपयं इच्छसु । अवणीयं ते सल्लं' । साऽवि तं सोउं 'अहो मम लुद्धेण वावाइओ गुणरयणनिही अज्जउत्तो इमिणा नरिंदाहमेण । ता जाव सीलभंगं न करेइ ताऽवंतिसेणं पुत्तं मोत्तुमिहेव अण्णत्थ वच्चामि'त्ति चिंतित्ता वियाले चेव गहियाहरणा पयट्टा सत्थेण सह कोसंबीए । तीए य अजियसेणो राया । धारिणी से देवी ।
कमेण य संपत्ता तत्थ । दिट्ठाओ साहुणीओ वंदियाओ य । ताहिं च पुच्छियाए साहिओ परमत्थो । संजायसंवेगाइसया य पव्वइया । [तओ] अपत्थासिणो विव वाही वड्डिउमाढत्तं पोट्टं । पुच्छिया पवत्तिणीए - 'वच्छे ! किमेयं ?' तीए भणियं – 'आवन्नसत्ता पव्वइया । न य पुव्वं सिटुं, मा पव्वज्जा न होही'। मयहरियाए भणियं - 'न य सुंदरं कयं' । पच्छण्णाए य पालिओ गब्भो । कमेण य सव्वलक्खणसंजुत्तं पसूया दारयं । 'मा य साहु-साहुणीणं अवण्णवायसंकिलेसायासादओ हवंतु'त्ति चिंताए रट्टवद्धण-नामंकियाए रयणमुद्दियाए सह मुक्को नरिंदभवणंगणे । मोत्तूण अवक्कंता साहुणी ।
दारओ वि उवरितलारूढेण मणिप्पभासमुज्जोइयगयणंगणो दिट्ठो राइणा । घेत्तूण य दिण्णो धारिणीए, 'एस ते अपुत्ताए पुत्तो'त्ति । 'पच्छण्णगब्भा य मे देवी पसूयत्ति पयासिऊण करावियं वद्धावणयं । साहुणी चितं मोत्तुमागया पुच्छिया सेससाहुणीहिं - 'कत्थेगागिणी गया ओममीसि(आसि?)' । तीए भणियं - 'डिभरूवं मयगं जायं । तप्परिट्ठवणमि(ट्ठवणत्थं गयाऽऽसं?)' । बालगो वि य धाईहिं परिवुडो वड्डिउमाढत्तो । कयं च से नामं मणिप्पभो त्ति । सा य साहुणी महादेवीए सह मेत्ति काऊण अभिरमावंती मणिप्पभस्स इट्टा जाया ।
इओ तीए चेव कोसंबीए धम्मवसू नाम आयरिओ । तेसिं च दो पहाणसीसा - धम्मघोसो धम्मजसो य । तहा विनयलया नाम पवत्तिणी । विणयवई य से सिस्सिणिया । तीए य कयमणसणं । तओ संघेण नाइवग्गेण य सा महापूयासक्कारपुव्वगं निज्जामिया । ते य धम्मघोस-धम्मजसा साहुणो अणसणत्थं संलेहणं काउमाढत्ता । चिंतियं च धम्मघोससाहुणा – 'जहा समणसंघाओ विणयवईए पूयासक्कारो इहट्ठियाए पाविओ तहाऽहमवि पाविस्सामि । ता इहट्ठिओ चेव अणसणं करिस्सामि' । धम्मजसो पुण कम्मखयत्थमुज्जओ 'किं पूया-सक्कारेण कायव्वं ? तत्थ वच्चामि जत्थ न कोइ जाणइत्ति भावेंतो कोसंबीए उज्जेणीए य अंतरे वच्छगानईतीरे पव्वयस्स कंदरंमि गओ अणसणत्थं ।
इओ य कोसंबीए कमेण संपत्तजोव्वणस्स मणिप्पभस्स मओ अजियसेणनरिंदो । तओ असाहारणरूवगुणो चाऽसो त्ति नाऊण अणिच्छंतो वि अहिसित्तो महासामतेहिं मणिप्पभो रायाहिसेएणं । अवंतिवद्धणो वि तया उज्जेणीए विणासिए रट्ठवद्धणंमि नट्ठाए धारिणीए देवीए 'अव्वो जीए निमित्तं भाया वावाइओ सा वि मे देवी न जाय'त्ति समुप्पण्णपच्छायावो ताणं चिय सुयस्स अवंतिसेणकुमारस्स रज्जं दाऊण महाविभूईए पव्वइओ । जाओ य पयंडसासणो अवंतिसेणो राया । पट्ठविओ य तेण कोसंबीए मणिप्पभस्स दूओ