Kahavali Pratham Paricched Part 02

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 334

[३१७]
घयमहुसंजुत्तं आणीयं तं च समुद्दिटुं । तओ अप्पणो चेव हिंडंतो लद्धिसंपण्णो बहूणं बाल-दुब्बलाणं आधारो जाओ ।
तत्थ य गच्छे तिण्णि पूसमित्ता । एगो दुब्बलियपूसमित्तो १, बीओ घयपूसमित्तो २, तइओ वत्थपूसमित्तो ३ । तत्थ जो दुब्बलियापूसमित्तो सो पाढओ(झरओ) । घयपूसमित्तो पुण घयमुप्पाएइ । तस्सिमा लद्धी - दव्वओ गच्छे घयदव्वेण सारेयव्वं । खेत्तओ उज्जेणीए । कालओ जेट्ठासाढेसु मासेसु । भावओ एगा धिज्जाइणी । तीसे भत्तुणा थोवं थोवं मेलितेण छहिं [मासेहिं] वारओ घयस्सोसहनिमित्तं भरिओ । जओ से वियाइयाए उवगिरिहिइ । पूसमित्तेण य घयं मग्गिया अन्नं नत्थि, तं पि सा हट्टतुट्ठा दिज्जा । परिमाणओ जत्तियं गच्छे उवउज्जइ । सो य नीसरंतो चेव पुच्छइ – 'कस्स कित्तिएणं घएणं कज्जं ?' जत्तियं भणंति तत्तियं आणेइ । वत्थपूसमित्तस्स पुण एमेव लद्धी वत्थेसु उप्पइव्वए [दव्वओ वत्थं, खेत्तओ मथुराए, कालओ वासासु सीयकाले वा, भावओ जहा काइ रंडा । तीए दुक्खंदुक्खेणं परिवारेंतीए रोक्काए कत्तिऊण एक्का पोत्ती वुणाविया, 'कल्लं परिहिस्सामि'त्ति । एत्थंतरा सा पूसमित्तेण जाइया हट्टतुट्ठा दिज्जा। परिमाणओ सव्वस्स गच्छस्स उप्पाएइ ।
जो य दुब्बलियपूसमित्तो तेण नव वि पुव्वाणि अहिज्जियाणि । ताणि य दिवसे रत्तीए य [गुणंतो झरंतो] सो झरणाए दुब्बलो जाओ । जइ पुण न गुणेइ तो तस्स सव्वं चेव वीसरइ । तस्स पुण दसपुरे चेव सयणिज्जगाणि । ताणि पुण रत्तवडोवासगाणि आयरियाणं पासं अल्लियंति । तओ ताणि भणंति - 'अहं भिक्खू झाणपरा, तुम्हं झाणं नत्थि' । आयरिया भणंति – 'अहं चेव झाणमत्थि, जओ एसो तुब्भं निएल्लओ दुब्बलियपूसमित्तो झाणेणं चेव दुब्बलो' । ताणि भणंति – ‘एस गिहत्थत्तणे निद्धाहारेण बलिओ आसि, इयाणि नत्थि तेण दुब्बलो' । आयरिया भणंति - ‘एस न [कयाइ नेहेण विणा जेमेइ' । ते भणंति –] 'कुओ तुम्हं नेहो ?' आयरिया – 'घयपूसमित्तो [निच्चं घयं] आणेई' । ताणि न पत्तियंति । ताहे आयरिया भणंति – 'एस तुब्भं मूले किं आहारेंतो ?' ताणि भणंति – 'सुट्ट निद्धपेसलाणि' । तओ सो सूरिणा तेसिं संबोहणत्थं घरं ताणं विसज्जिओ । नेऊण गेहे तहेव दाउं पवत्ताणि । तस्स य निरंतरं सज्झायंतस्स तं नज्जइ छारे छुब्भइ । ताणि गाढतरं देंति । तओ निविण्णाणि । तओ सूरीहिं भणियं - 'संपयमसज्झाएंतो भिक्खाहारमाहारेउ' । तओ सो तहा कुणंतो पुणो वि पोराणसरीरो जाओ । ताहे ताण उवगयं । धम्मो कहिओ । सावगाणि जायाणि ।
तत्थ गच्छे चत्तारि जणा गुणिणो । तं जहा - सो चेव दुब्बलियपूसमित्तो १ । विंझो २, फग्गुमित्तो ३, गोट्ठामाहिलो ४ । तत्थ जो सो विंझो सो अईव मेहावी सुत्तत्थतदुभयाणं गहणधारणसमत्थो । सो पुण सुत्तमंडलीए विसूरइ । जाव परिवाडी आलावगस्स एइ ताव निव्विज्जइ । तओ आयरियं भणइ - 'अम्ह सुत्तमंडलीए विसूरामि, जओ चिरेणाऽऽलावगो परिवाडीए एइ । ता मम वायणायरियं देह' । तओ आयरिएहिं दुब्बलियपूसमित्तो तस्स वायणायरिओ दिण्णो । सो कइवयदिवसे वायणं दाऊण आयरियमुवट्ठिओ भणइ – 'मम वायणं देंतस्स वीसरइ । जं च सण्णायघरे नाऽणुपेहियं तं च मम अज्झरंतस्स नवमपुव्वं नस्सिहिइ' । ताहे सूरिणो 'जइ तावेमस्स महामेहाविणो वि सुयं वीसरइ ता कहमन्नेसिं ठाही ? विसेसओ विसमं पमाणसुयं ?'ति चिंतित्ता संखेवत्थं चरणकरणाणुओगं १, धम्मकहाणुओगं २, गणियाणुओगं ३, दव्वाणुओगं ४ ठावेंति । पमाणगंथरूवो य दव्वाणुओगो त्ति ।