Kahavali Pratham Paricched Part 02

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 338

[३२१]
जिणकप्पिया य दुविहा, पाणीपाया पडिग्गहधरा य ।
पाउरणा अपाउरणा, एक्केक्का ते भवे दुविहा ॥ [प्रवचनसारोद्धारे ४९३] सो भणइ – 'किं जिणकप्पो संपयं न कीरइ ?' सूरीहिं भणियं - 'वोच्छिण्णो' । सो भणइ - 'जइ परं तुम्हं, मम पुणऽज्ज वि न वोच्छिज्जइ । ताहे तं चेव जिणकप्पमुवसंपज्जित्ताणं निप्परिग्गहो विहरिस्सामि' । सूरीहिं भणियं - ‘भद्द ! मुच्छा चेव परिग्गहो । तव्विरहियं पुण वत्थ-पत्ताईयं धम्मोवगरणबुद्धीए सील-दयाइपरिपालणत्थं धारिज्जमाणमवि न दोसावहं' । एवं च सो सूरीहिं पण्णविज्जमाणो वि कम्मोदएणं चीवराइयं छड्डित्ता निग्गओ । सामिमुत्तिसमया नवुत्तराणि छव्वाससयाणि त्ति ।
. सिवभूइस्स बाहिमुज्जाणे गंतुं ठियस्सुत्तरा नाम भगिणी विण्णायवुत्तंता वंदणत्थमागया । तहा य तं दट्ठण तीए वि छड्डियं चीवराईयं । ताहे भिक्खत्थं पविट्ठा दिट्ठा गणियाए । चिंतिउं च 'मा अम्हं लोगो विरज्जिस्सइ'त्ति उरे से बद्धा पोत्ती । सा नेच्छइ । सिवभूई भणइ – 'चिट्ठउ जेणेसा ते देवयाए दिण्णा' । दिक्खिया य सिवभूइणा दो सीसा - 'कोडिण्णो कोट्टवीरो य । तेसिं च सीसपरंपराए संजायं खवणयदरिसणं ति ॥छ। सिवभूइ त्ति गयं ॥
इय निण्हवसिवभूइ व्व कम्मओ केइ एंति मिच्छत्तं । गुरु-संघपच्चणीया, परमप्पाणं पि सच्छंदा ॥ धन्ना उण निन्नासिय, मिच्छत्तं तत्थमुन्नईमेंति । तह सिद्धते भणिया, पभावगा अट्ठ; ते य इमे ॥ पावयणी, धम्मकही, वाई, नेमित्तिओ, तवस्सी य । विज्जासिद्धो य कवी, अद्वैव पभावगा भणिया । [सम्बोधप्रकरणे ९२६] तत्थऽत्थओ पवयणं, बेइ अहीए य सुत्तओ सम्मं । सो पावयणी एवं, नेया नेमित्तियनिरुत्ती ॥ धम्म कहिउं सीलं, अस्स त्ति निरुत्तिओ य धम्मकही । साइसयं ति विसेसिया, वाओ य तवो य जस्स त्ति ॥ सो वाई य तवस्सी, विज्जाबलिओ य नाम विज्ज त्ति । पायलेवाइसिद्धो, सुकव्वकत्ता कवी नाम ॥ एयगुणा य पुरिसा, अद्रुव पभावगा पवयणस्सा ।
एक्को वि य पुण्णप्पा(?), कोइ जहा कालगज्जो त्ति ॥छ।। कालगायरियकहा भण्णइ -
अवंतीविसए उज्जेणीनयरीए दप्पणो नाम राया । तस्स य किर केणाऽवि जोगिएणं दिन्ना गद्दही नाम विज्जा । सा य जत्थ साहगनिउत्ता तस्समुहा होउं विउव्विया गद्दभीरूवा नादेइ । जो य तिरिओ मणुओ वा रिउसंतिओ तस्सदं सुणेइ सो सव्वो रुहिरं वमंतो भयविहलो नट्ठसन्नो निवडइ । सिद्धा य विहिसाहणेणं दप्पणरन्नो गद्दभी विज्ज त्ति गद्दहिल्लो नाम सो पसिद्धिं गओ ।
पलंबं तयाणि जिणसासणमुज्जेणीए । तम्मज्झे पवयणपुरिसो सूरि[पय]समण्णिओ कालगायरिआ