Kahavali Pratham Paricched Part 02

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 340

. [३२३]
__ [तस्स य गद्दभिल्लस्स एक्का विज्जा गद्दहीरूवधारिणी अत्थि । सा य एगमि अट्टालगे परबलाभिमुहा ठविया । ताहे परमे आधिकप्पे अट्ठमभत्तोववासी गद्दहिल्लो राया तं अवतारेति । ताहे सा गद्दभी महंतेण सद्देण नादति, तिरिओ मणुओ जो वा परबलिओ सदं सुणेति स सव्वो रुहिरं वमंतो भयविब्भलो नट्ठसण्णो धरणितलं निवडइ ।]
तत्थंतरंमि य गद्दहिल्लेण सुईभूएण होउं सुमरिया गद्दही विज्जा । अवयरिया य सा गद्दहरूवधारिणी। ठविया एगंमि अट्टालगे परबलाभिमुहो(हा) । तव्विसेसाराहणत्थं चेगत्थ ठिओ गद्दहिल्लो अट्ठमभत्तोववासी। तं च तहाऽऽराहगं नाउं कालगज्जेणाऽणागयमेव निरो(रू)वियं गद्दहीसमुहं दक्खाणं सद्दवेहिजोहाणमट्ठत्तरसयं भणियं च - 'जया एसा गद्दही नानिहिउ(निनदिउ?)कामा तया मुहं पसारेही । जाव य सदं न करेइ ताव समकालमेईए मुहं सरेहिं तुब्भे पूरिज्जह' । तेहिं वि जोहेहिं तहेव कयं । ताहे सा वाणमंतरी तस्स गद्दहिल्लस्सोवरिं हगिउं लत्ताहिं य हंतुं गया सट्ठाणं । तव्विरहिओ अबलो उम्मूल्लिओ गद्दहिल्लो [जाओ] । गहिया उज्जेणी । एवं च पुण्णपइण्णो कालगसूरी तं भगिणि पुणरवि संजमे ठवित्ता विहरिओ अन्नत्थ उज्जयविहारेणं ।
___ साहिप्पमुहराणएहिं चाऽहिसित्तो उज्जेणीए कालगसूरिभाणेज्जो बलमित्तो नाम राया । तक्कणिट्ठभाया य भाणुमित्तो नामाऽहिसित्तो जुवराया । तेसिं च भगिणी भाणुसिरी नामा । तीसे पुत्तो बलभाणू नाम । सो य पगइभद्दय-विणीययाए साहू पज्जुवासइ । पत्तो पुणो विहरंतो वरिसायालासण्णमुज्जेणि कालगसूरी । बहुमण्णिओ रायाईहिं । तम्मज्झे य जोग्गो त्ति विसेसओ साहिओ सूरीहिं बलभाणुणो धम्मो । तं च सोउं संबुद्धो [सो] पव्वाविओ । न य पुच्छिया बलमित्त-भाणुमित्त त्ति रुद्रुहिं तेहिं पसन्न(ज्झ?)माणत्तो निव्विसओ कालगज्जो । सो वि नत्तुयासंघएणं निग्गहत्तणेण य तेसिं वयणमवमन्निऊण ठिओ न य पज्जोसवणं कुणइ । बलमित्तो वि भाणुसिरीए 'किं न जाणह गद्दहिल्लवुत्तंतं जेणाऽवमाणेह माउलगं'ति भणिओ पच्छाताविओ पुणो मामयस्स कुणंति महंतमायरमब्भुट्ठाणेइ [य] । एयं च सहिउमस्सक्कंतो मंगाहरो नाम पुरोहिओ भणइ – 'देव ! सुद्धपासंडो एसो वेयाइबाहिरो' । एवं च रण्णो पुरओ पुणो पुणो उल्लवंतो सूरिणा निप्पट्ठपसिणवागरणो कओ । ताहे खरयरमाविट्ठो पुरोहिओ 'न दंडेणेमेसि कि पि पणिस्सति'त्ति चिंतिय रायाण(णं?) मंडलोवोमएहिं(?) विप्परिणामेड जहा - 'एए रिसओ महाणभागा । ता जेण पहेणेमे गच्छंति तेणेव जस्स रण्णो जणो गच्छइ पयाणि वा अइक्कामइ तस्साऽसेयं महंतं हवइ । ता विसज्जिज्जंतु नियविसयाओ सूरिणो' । सोउं चेमं कम्मदोसेणाऽइसूगिया बलमित्त-भाणुमित्ता । कराविया सूरिनीसरणत्थं तेहिं सव्वंमि नगरे भत्तपाणाणेसणा । तं च नाउं पढमपाउसि च्चिय निग्गया उज्जेणीओ कालगसूरिणो । ___बहुपरिवारा य ते न जहिं तहिं वा निव्वहंति त्ति पट्ठिया पइट्ठाणपुरं । जाणावियं चाऽणागयमेव तहंतेच्चियसंघस्स - 'जावाऽहमागच्छामि ताव तुब्भेहिं न कायव्वं पज्जोसवणं' । तत्थ य सालवाहणो राया। सो य सावगो त्ति कालगज्जमेंतं सोउं निग्गओ समुहो समणसंघो य । तओ महाविभूईए पविट्ठो पइट्ठाणं कालगज्जो । भणियं चाऽणेण - 'भद्दवयसुद्धपंचमीए कीरउ पज्जोसवणं' । पडिवण्णं च तं समणसंघेण। सालवाहणो य राया परमसावओ । पज्जोसवणाइधम्मदिवसे विसेसओ जिणवंदणाइ किच्चं कुणइ ।