________________
વજ્રસ્વામીનો જીવ પૂર્વ જન્મમાં દેવ તરીકે. અષ્ટાપદ તીર્થની યાત્રાએ ગયેલ એ દેવને મળ્યા ભગવાન ગૌતમ. તેમણે દેવને ‘ધર્મલાભ’રૂપ આશિષ આપી. દેવ પૂછે છે : ધર્મ એટલે શું ? ભગવાન ગૌતમ કહે : ધર્મ એટલે પ્રભુની આજ્ઞાનું પાલન; જે પૂર્ણતયા સાધુજીવનમાં મળે.
દેવને સાધુત્વની પ્રાપ્તિની અદમ્ય ઝંખના જાગી. ગૌતમ સ્વામીએ તેને પુંડરીક-કંડરીક અધ્યયન આપ્યું; અને રોજ એનો સ્વાધ્યાય કરવાનું સૂચવ્યું. સાધુત્વના મહિમાને ઉજાગર કરતા એ અધ્યયનનું પારાયણ દેવે શરૂ કર્યું. તમે જાણીને નવાઈમાં પડશો : રોજ પાંચસો વખત એ દેવ એ અધ્યયનનો સ્વાધ્યાય કરે છે. પાંચસો વર્ષનું દેવ તરીકેનું આયુષ્ય બાકી હતું. પાંચસો વર્ષ સુધી, નિરન્તર, રોજના પાંચસો વાર એ અધ્યયનનો સ્વાધ્યાય થયો.
એવું ઘૂંટાઈ ગઈ દીક્ષાનું માહાત્મ્ય ભીતર કે વજ્રકુમાર તરીકે નાનપણમાં, પારણામાં દીક્ષા શબ્દ સાંભળતાં જાતિસ્મરણ જ્ઞાન થયું. દીક્ષાનો સંકલ્પ દૃઢ બન્યો. અને દીક્ષા થઈ ગઈ.
ભૌતિક દુનિયાની વાત કરીએ તો, બિધોવન સંગીત સમ્રાટ. એક સમારોહમાં તેમને સાંભળ્યા પછી એક ભાવક શ્રોતાએ કહ્યું : વાહ ! અદ્ભુત આ સંગીત ! દિવ્ય ! બિધોવને કહ્યું, ચાલીસ વર્ષ સુધી રોજના આઠ કલાક જો તમે રિયાઝ કરી શકો તો તમારે કંઠેથી પણ આવું ગાન પ્રગટે !
ચાલીસ વર્ષ સુધી નિરન્તર આઠ કલાકનો રિયાઝ !
આ નિરન્તરતા સાધનામાં નિખાર લાવ્યા વગર કેમ રહે ?
સમાધિ શતક
|૫
