________________
પતિ બેડરૂમમાં જાય છે. પત્નીને કહે છે કે આઠ મહેમાનો આવ્યા છે. જમવાનું બનાવવાનું છે.
પત્ની તરત જ રસોઈની ધમાચકડીમાં પડે છે. આ કડાકૂટ અને આ સમયે. છતાં, પત્નીના ચહેરા પર આનંદ છે. કેમ ? ‘એમણે’ કહ્યું છે. એમની - પતિદેવની ઈચ્છા છે.
પતિ પ્રત્યેનો પ્રેમ અહીં ધ્વનિત થઈ રહ્યો છે. પીરસવામાં તો કદાચ આનંદ આવી શકે. જમનારનો પ્રતિભાવ સામે દેખાતો હોય. પણ રસોઈની કડાકૂટના સમયે આનંદ. એ છે પતિ પરના પ્રેમનું પત્નીનું પ્રતિબિમ્બ.
ભક્તિધારામાં આપણે ત્યાં પ્રીતિ અનુષ્ઠાનની વાત આવે છે. પરમાત્મા પરના પ્રેમથી રંગાયેલું અનુષ્ઠાન.
એક મુનિરાજ ગમે એટલી પીડા ભોગવતા હોય, છતાં આનંદમાં રહેવાના. કારણ ? મારા ભગવાને અસાતા વેદનીય કર્મના ઉદયને સહેવાનો કહ્યો છે.
પીડા સહેવાની આ ક્ષણો....પણ મીઠી મીઠી ક્ષણો. કહો કે પીડાને માણવાની ક્ષણો.
પ્રીતિ અનુષ્ઠાન.
અનુષ્ઠાન નાનકડું હોય, પણ પ્રભુપ્રેમના રંગથી એ રંગાયેલું હોય. મહાસતી રેવતીજીને આંગણે સિંહ અણગાર ભિક્ષાએ પધાર્યા. જ્યારે મહાસતીજીએ જાણ્યું કે હું જે ઔષધિપાક વહોરાવીશ, તે પ્રભુ પોતે વાપરશે.
નાચી ઊઠ્યાં મહાસતીજી.
સમાધિ શતક | ૯૯
