Rushidatta Charitra Sangraha

Author(s): Chandanbalashreeji
Publisher: Bhadrankar Prakashan

Page 372

२९८]
[ऋषिदत्ताचरित्रसंग्रहः ॥ ता काऊण पसायं गारुडमतेण कुणसु तं पउणं । तं सुणिय मंजुलावइनयरिं संपत्थिओ राया ॥१२२॥ पत्तो य तेहिं समयं तन्नयरीए खणेण नरनाहो । दिट्ठो य रायलोगो सह नरवइणा विसन्नमणो ॥१२३॥ अह भणइ नरवरिंदो तुह कन्नं पन्नवेमि विसपुन्नं । इय धीरविओ राया तेण वि मंतप्पओगेण ॥१२४॥ उछविया निवधूया उच्छंगे ठाविण नियपिउणा । पुट्ठा पसन्नवयणा किं तुह बाहइ सरीरम्मि? ॥१२५॥ ताय ! न किंपि हु बाहइ परमेसो किं बहू जणो मिलिओ? । तूररवो वि किमेसो ? तो भणियं तीए जणएण ॥१२६॥ वच्छे ! तं भुयगेणं अहेसि दट्ठा मय त्ति काऊण । आणीया पेयवणे चियाइयं पउणियं एयं ॥१२७॥ दिन्ना य तुज्झ पाणा निक्कारणवच्छलेण नरवइणा । एएण मज्झ पुन्नाणुभावओ भणियमेईए ॥१२८॥ जइ एवं ताय ! मए वि निययपाणा महाणुभावस्स । दिन्ना इमस्स जणएण जंपियं जुत्तमेयं ति ॥१२९॥ हरिसेणेण वि भणियं सुणसु महाभाग ! गुरुसयासम्मि । पव्वइउमणो अहयं तवोवणं गंतुमिच्छामि ॥१३०॥ तं नियधूयं वियरसु कस्स वि अन्नस्स तं निसामेउं । भणियं पियमइनामाए तीए कन्नाए वयणमिणं ॥१३१॥ मज्झ सरीरे एसो लग्गइ जलणो व तइयओ नत्थि । तं निच्छयं वियाणिय दिन्ना तेणावि परिणीया ॥१३२॥ तं घेत्तूणं नियनयरिमागओ तीए सह सिणेहेणं । विसयसुहं भुजंतो गमेइ कालं निरुव्विग्गो ॥१३३॥ अह अन्नया य सुमरियगुरुवयणो भणइ पियमइं राया। तं गिण्हसु पउरधणं चिट्ठसु गेहम्मि पसयच्छि ! ॥१३४॥ अहयं भवनिम्विन्नो संपइ तावसवयं पवज्जामि । अंसुजलभरियनयणा सा वि इमं भणिउमाढत्ता ॥१३५॥ तरुविरहे कइया वि हु चिट्ठइ किं तरुसमस्सिया छाया ? । अहमवि तुह पिय ! विरहे निवसामि गिहे न कइया वि ॥१३६॥ ता पुणरवि वयणमिमं दुहजणयं सव्वहा न वत्तव्वं । इण्हि तं चेव गई मई वि मह सामि ! तं चेव ॥१३७॥ इय तीए मुणिऊणं विणिच्छयं नेहपासपडिबद्धो । सकलत्तो संपत्तो एयम्मि वणम्मि सो कुमर ! ॥१३८॥
D:\chandan/new/datta-p/pm5\2nd proof