Rushidatta Charitra Sangraha

Author(s): Chandanbalashreeji
Publisher: Bhadrankar Prakashan

Page 395

[३२१
परिशिष्टम् [२] ऋषिदत्ताख्यानकम् ॥]
तो सव्वकम्मविगमे सरूवलाभम्मि निच्चओ जीवो । सासयसोक्खे मोक्खे अणाइनिहणं वसइ कालं ॥५०७॥ सो तम्मि निराबाहो केवलवरनाण-दंसणपईवो । अणुभवमाणो निवसइ निरुवमसोक्खं जओ भणियं ॥५०८॥ न वि अस्थि माणुसाणं तं सोक्खं न वि य सव्वदेवाणं । जं सोक्खं सिद्धाणं अव्वाबाहं उवगयाणं ॥५०९॥ जह नाम कोइ मेच्छो नयरगुणे बहुविहे वियाणंतो । न चएइ परिकहेउं उवमाए तहिं असंतीए ॥५१०॥ इय सिद्धाणं सोक्खं अणोवमं नत्थि तस्स ओवम्म । किंचि विसेसेणेत्तो सारिक्खमिणं सुणह वोच्छं ॥५११॥ जह सव्वकामगुणियं पुरिसो भोत्तूण भोयणं कोइ । तन्हा-छुहाविमुक्को अच्छेज्ज जहा अमयतित्तो ॥५१२॥ इय सव्वकालतित्ता अउलं निव्वाणमुवगया सिद्धा। सासयमव्वाबाहं चिटुंति सुही सुहं पत्ता ॥५१३॥ इय सोउं उवएसं सवणसुहामयपवाहसारिच्छं । भवभयसंभंतो भणइ भूवई भव्वपरिणामो ॥५१४॥ भयवं ! जं तुब्भे भणह भीमभवभयमिमेसि भव्वाणं । भवभयभीयाणं तत्थ विब्भमो मह मणे नत्थि ॥५१५॥ ता एयं मणुयभवं सफलं काहामि तुम्ह पासम्मि । पडिवज्जिय पव्वज्जं काऊणं रज्जसुत्थत्तं ॥५१६॥ एत्थंतरम्मि मत्थयनिहित्तकरकोससंपुडा देवी । रिसिदत्ता मुणिनाहं परिपुच्छइ पउरपच्चक्खं ॥५१७॥ भयवं ! रक्खसिवाओ मह जाओ केण कम्मुणा ? कहह । नाऊणऽइसयनाणेण कोउयं मज्झ अइगरुयं ॥५१८॥ तो पारद्धो कहिउँ भद्दजसो गणहरो मिउगिराए । अवहियचित्ता होउं खणमेक्कं सुणसु तं भद्दे ! ॥५१९॥ अत्थि इह जंबुदीवे नयरं गंगाउ मणभिरामं । चित्तमिमं जं न तयं कयाइ विसमक्खपरिभुत्तं ॥५२०॥ तं पालइ नरनाहो अरिवग्गकुरंगसंहरणवाहो । नामेण गंगदत्तो रिवुगयघडदलणथिरसत्तो ॥५२१॥ सव्वंतेउरसारा गंगा नामेण तस्स पियभज्जा । नामेण गंगसेणा तस्स सुया सव्वगुणदइया ॥५२२॥ चंदजससाणीए पासे तीए जिणिंदपन्नत्तो। पत्तो धम्मो सा तं परिपालइ सुद्धपरिणामा ॥५२३॥
D:\chandan/new/datta-p/pm5\2nd proof