Nandanvan Kalpataru 2019 06 SrNo 42

Author(s): Kirtitrai
Publisher: Jain Granth Prakashan Samiti

Page 82

एएसिं सलागापुरिसाणं गुणाणं उक्कित्तणं पुव्वकालम्मि पुव्वाणुयोगम्मि आसी । अज्जयणसमए सो न लहिज्जइ । अहुणा उ सलागापुरिसवण्णणविसया गंथा इमे संति । १ चउप्पण्णमहापुरिसचरियं, २ कहावली सिरिभद्देसरसूरिविरइया. ३. हेम-तिसट्ठी, ४ उवज्झायमेहविजयगणिविरइया लहु-तिसट्ठी ।
अन्नं च दिगंबरीयमयम्मि महापुरिसवण्णणविसया कइई गंथा संति, जे इमे -
१ सिरिजिणसेणायरिएण आइपुराणदुवारेण महापुरिसचरियं पारद्धं, तस्स य सीसेण गुणभद्देण उत्तरपुराणरूवेण संपुण्णं विहियं । २ पुप्फदंतविहियं तिसट्ठिमहापुरिसालंकारु किं वा महापुराणं ।
कलिकालसव्वण्णुसिरिहेमचंदपहुणा सक्कयभासाए तिसट्ठिसलागापुरिसचरियं छत्तीससहस्ससिलोगसंखपमाणं विरइयं अत्थि । तं च दससु पव्वेसु विभइयं तहिं च पढमपव्वम्मि छ सग्गा संति ।।
एवं इहयं पि पत्थुयचरियं पढमपव्वस्स पाइयभासाए रूवंतरं अत्थि । इहावि पव्वस्स ठाणम्मि वग्गो तह य सग्गस्स ठाणम्मि उद्देसो, एरिसं नामं ठवियं ।
अहिगारा -
देवाहिदेव-पढमसिरिउसहणाहस्स तेरस भवा संति । तत्थ पढमोद्देसम्मि दुवालस भवा । तह बीय-उद्देसाओ चरिम-छट्ठद्देसं जाव तेरसमो अंतिमभवो वण्णिओ अत्थि ।
विसेसओ - बीयउद्देसम्मि सत्तकुलगराणं वुत्तंतो, तह य भरहचक्कवट्टिस्स उप्पत्ती निद्दिट्ठा । तइयम्मि भरहरायस्स चक्करयणलाहो, मरुदेवाए मोक्खगमणं । चउत्थम्मि भरहरायस्स छक्खंडसाहणा। पंचमम्मि भरहस्स बाहुबलिणा सद्धि जुद्धं । छट्ठम्मि भरहनरवइणो पुत्तस्स मरीइणो वेसपरिवट्टणं । सिरिउसहणाहस्स भरहचक्कवट्टिणो य अट्ठावयगिरिम्मि निव्वाणपयसंपत्ती ।
___ अवरं च एयस्स गंथरयणाए सिरितवागच्छाहिवइ-सासणपहावग-आबालंबभयारि-सूरीसरसेहराऽऽयरियविजयनेमिसूरीस-पट्टालंकार-समयण्णू-वच्छल्लवारिहि-गुरुदेवसिरि-आयरयिविजयविण्णाणसूरीसरं सुमरणपहम्मि समाणेमि। तास अणुवमकिवादिट्ठीए सुहासिसाए य पेरिओ हं गंथसमत्तीकरणे पक्कलो संजाओ। तस्स य निद्देसेण मुद्दणालए मुद्दणटुं एसो गंथो समप्पिओ। किंतु संपुण्णमुद्दणकज्जाओ पुव्वं तस्स गुरुदेवस्स सिरिथंभतित्थे ओसवालुवस्सयम्मि विक्कमस्स नेत्त-भुय-गयण-कर(२०२२) वरिसम्मि महुमासस्स सुक्कदसमीवासरे आराहणपुव्वगं देहविलयाओ सरणविरहिओ हं संजाओ, तेण गुरुदेवविरहबाहा मे चित्तं अज्ज वि जाव अईव दूमेइ ।
पज्जते इमस्स गंथस्स मुद्दणपत्ताणं संसोहणकम्मम्मि मईयपरिवारगय-उवज्झायचंदुदयविजयगणिमुणिअसोगचंदविजय-मुणिजयचंदविजयपमुहेहिं जेहिं सहेज्जं दिण्णं ते वि धण्णवायारिहा ।
इअ वेय-नयण-गयण-कर(२०२४)वरिसम्मि सूरियपुरम्मि विजयकत्थूरसूरी निवेएइ ।