Nandanvan Kalpataru 2019 06 SrNo 42

Author(s): Kirtitrai
Publisher: Jain Granth Prakashan Samiti

Page 131

अणकढिअ-दुद्ध-सुइ-जस पयाव-घम्मट्टिआरि-जस-कुसुम । तुह गंठिअ-वूहेणं विरोलिओ तस्स पुर-जलही ॥८१॥ मंथिअ-दहिणो तुप्पं व घुसलिआ तस्स नयरओ कणयं । गिण्हंतेहिं तुह सेणिएहिँ अवअच्छिआ अम्हे ॥८२॥ तस्स चमूवा समरे णुमज्जिआ तुह भडेहि णिव्वरिआ । णिज्झोडणेहि णिल्लूरणा वि अणलूरिअ-पयावा ॥८३॥ छिंदिअ-छत्त-दुहाविअ-सिरक्क-णिच्छल्लिउत्तमंगाण । उद्दालिआ दसण्णाण सिरी चोलुक्क-सुहडेहिं ॥८४॥ तिहुअण-जस-ओअंदण-रिउ-अच्छेदण-चमूइ पहु तुज्झ । मलिऊण बलं तिउरीसरस्स परिहट्टिओ माणो ॥८५॥ चड्डिअ-नक्का मड्डिअ-महा-तडा खड्डिआखिलारामा । पन्नाडिअ-द्रह-पंका तुज्झ चमूए कया रेवा ॥८६॥ पय-मढिअ-पंसु-मसिणे चूलुचुलमाणाणिलेण कय-फन्दे । रेवा-तड-लय-गहणे निव्वलिओ तुह बल-निवेसो ॥८७॥ नीपाइअ-जय-कज्ज अविअट्टिअ-विक्कमं बलं तुज्झ । अविलोट्टिअ-जय-महुराहिवस्स फंसावही विजयं ॥८८॥ अविसंवाइ-परिक्खा तणु-पक्खोडण-झडंत-पंसु-कणा । णीहरिअ-नक्क-चक्कं तुह तुरया जउणमुत्तिन्ना ॥८९॥ रिउ-अक्कंदावणयं अखिज्जमाण-हयमजूरिएभकुलं । अविसूरत-चमूवं पत्तं महुराइ तुह सेन्नं ॥१०॥ उत्थंघिअ-वारेहिं रुधिअ-मग्गेहि हक्कमाणेहिं । कुज्झंतेहिं तुह सेणिएहिँ जूराविआ रिउणो ॥११॥ तुह जायंत-पवेसे सिन्ने जम्मंत-परिहवो तत्तो । तडिअ-भओ महुरेसो न तडवीआजि-संरंभं ॥९२॥ तड्डिअ-कणय-वएणं विरल्लिअं थिप्पिऊण तुह सेन्नं । महुरेसो तणिअ-दिही रक्खीअ निअं पुरिं महुरं ॥१३॥ सग्गल्लिअंत-जस-भर जंगल-वइणोवसप्पिउं दिण्णा । तुह रिउ-झंखावण-घण-पयाव-संतप्पिएण गया ॥९४॥
१२०