Nandanvan Kalpataru 2019 06 SrNo 42

Author(s): Kirtitrai
Publisher: Jain Granth Prakashan Samiti

Page 127

ओअरिअ दीहिआओ अचयंतीकय-तरंत-सुहडेहिं । तीरंताण वि पारंतएहिँ तेहिं कयं जुज्झं ॥५३॥ सक्कंतो अणथक्किअ-सलहिअ-सर-वरिसणो निवो ताण । मणि-खचिअ-कणय-वेअडिअ-माढिओ पहरिउं लग्गो ॥५४॥ दिन्नमसोल्लिअ-मंसासणाण अणपउलिअं तओ मंसं । अरि-पयण-पयावेणं तेणं सर-मिल्लिरेण रणे ॥५५॥ उस्सिक्किअ-संकेणं पच्छा अवहेडिउं निअं पि दलं । अणछड्डिअ-कुल-धम्मं सीह-झुणी तेण रेअविओ ॥५६॥ णिल्लुंछिअ-भय-पसरो धंसाडिअ-भयमिभं समारूढो । मुंचन्तो बाणे णिच्चलीअ सो कोह-दुहिअप्पा ॥५७॥ जूरवणेहि उमच्छंतेसुं जय-सिरि-अवंचिओ समरे । नाह अवेहविरेहिं पाइक्केहिं न वेलविओ ॥५८॥ उग्गहिअ-जय-पइन्नो अवहिअ-वूहम्मि गुज्जर-दलम्मि । विडविड्डीअ पएसं तक्कालं रइअ-रोमंचो ॥५९॥ सारविए रण-छेत्ते उवहत्थिअ-आउहेहिँ जुझंतो । केलाइआउहो सो निअं समारीअ जस-लच्छि ॥६०॥ पहु-कज्ज-समारचणेण सिंचिओ तुह बलेण बाणेहिं । सीभर-सिपिअ-वसुहो मय-सेअणओ इमो तस्स ॥६१॥ पडिसुहडे पुच्छंता गज्जंता ढिक्कमाण-वसह व्व । अह बुक्किआ तुह भडा कुंकण-देसाहिवं दटुं ॥६२॥ अग्घिअ-वम्मा छज्जिअ-सिरक्कया मण्डलग्ग-सहिअ-करा । रोहिअ-सेन्ना रीरिअ-रणंगणा राइआ ते अ ॥६३॥ आउड्डिअ-रह-चक्कं खुप्पंत-हयं णिउड्डमाणेभं । वुटुंत-भडं करि-रुहिर-मज्जणे ताण आसि रणं ॥६४॥ आरोलिअ-सर-माला-वमालणो मल्लिअज्जुणो राया । पुंजिअ-पहु-लज्जिर-गुज्जरेहि जीहाविओ तेहि ॥६५॥ ओसुक्कंतो तेअण-गिराहि सो खत्त-धम्म-लुहण-भडे । उग्घुसिअ-सेल्ल रोसाणिआसिणो के वि सिक्खविही ॥६६॥
११६