Nandanvan Kalpataru 2019 06 SrNo 42

Author(s): Kirtitrai
Publisher: Jain Granth Prakashan Samiti

Page 125

सग्गे वि हणिअ-विहवा असुणिअ-दोसा तिलोअ-सिरि-धुवणी । कुमर-नरिंद-सहा सा धुणिआरि-मणोरहा हूआ ॥३९॥ हुंताणंदो अहुवंत-संसओ निवइमुब्भुअंत-मई । पहवंतो अपरिहवो विण्णविही संधिविग्गहिओ ॥४०॥ देव विवक्खीहंतो णिव्वडिअ-बलेण सो पहुप्पन्तो । हूओ कुंकुण-नाहो जहा जहा कुणसु अवहाणं ॥४१॥ दूर-ट्ठिआहि करिउं णिआरिअं सुर-वहूहि दीसंता । संदाणंता अइनिट्ठहावणा वेरि-सुहडाण ॥४२॥ वावंफिरा कलासु अमोघ-णिव्वोलणं पयासंता । अपयल्लिर-असि-फलया णीलंछंता रिउ-दलम्मि ॥४३॥ कम्मंतमेत्त-मन्निअ-रिउणो गुललंत सामिणो विजये । दाउं वसुमझरंता पहु-आदेसं च झूरंता ॥४४॥ जुद्धेण भरावंता राम-कहं भारहं भलावंता । निअ-कुल-कम लढंता सुमरंता खत्तिआचारं ॥४५॥ वीर-वरणं सरंता पयरंता सामिणो पसायं च । बावण्णवीर-कह-विम्हरावणा वइर-पम्हुहणा ॥४६।। पम्हसिअ-अन्न-कज्जा विम्हारिअ-वाणरिंद-बल-ललिआ । वीसारिअ-रिउ-मंता तुह जोहा कुंकुणं पत्ता ॥४७॥ सीह-रव-पोक्कणा ते कोक्कंता किं पि सच्च-वाहरणा । उव्वेल्लिर-तुरय-पयल्लिरेभ-चडिआ पसरिआ अ ॥४८॥ अह महमहंत-णीहरिअ-मद-जले सिंधुरम्मि चडिऊण । ठाणाओ नीलिओ कुंकुणाहिवो नीसरंत-बलो ॥४९॥ वरहाडिआ गढाओ रण-धाडिअ-रक्खणा भडा तस्स । जग्गिअ-खग्गा रण-जागरा य आअड्डिआ तत्तो ॥५०॥ समरम्मि वावरंता साहट्टिअ-पर-बला असंवरिआ । अणसाहरिअ-प्पेम्मामरीहि सन्नामिआ वरिउं ॥५१॥ आदरिअ-वीर-वरणा सारते पहरिउं पयट्टा व । अणओहिअ-भड-माणा ओरसिआ इव सिवस्स गणा ॥५२॥
११४