Bhavbhavna Prakaranam

Author(s): Hemchandracharya, Vairagyarativijay
Publisher: Shrutbhuvan Sansodhan Kendra

Page 169

१५६
भवभावना
न मुणंति मूढहियया, जिणवयणरसायणं च मोत्तूणं। सेसोवाएहिं निवारिया वि हु ढुक्कइ पुणो वि जरा॥४१॥ तो जइ अत्थि भयं ते, इमाइ घोराइ जरपिसाईए। जियसत्तु व्व पवज्जसु, सरणं जिणवीरपयकमलं॥४२॥ समुवट्ठियम्मि मरणे, ससंभमे परियणम्मि धावंते। को सरणं परिचिंतसु, एक्कं मोत्तूण जिणधम्मं॥४३॥ सयलतिलोयपहूणो, उवायविहीजाणगा अणंतबला। तित्थयरा वि हु कीरंति कित्तिसेसा कयंतेण॥४४॥ बहुसत्तिजुओ सुरकोडिपरिवुडो पविपयंडभुयदंडो। हरिणो व्व हीरइ हरी, कयंतहरिणाहरियसत्तो॥४५॥ छक्खंडवसुहसामी, नीसेसनरिंदपणयपयकमलो। चक्कहरो वि गसिज्जइ, ससि व्व जमराहुणा विवसो॥४६॥ जे कोडिसिलं वामेक्ककरयलेणुक्खिवंति तूलं व। विज्झवइ जमसमीरो, ते वि पईवव्वऽसुररिउणो॥४७॥ जइ मच्चुमुहगयाणं, एयाण वि होइ किं पि न हु सरणं। ता कीडयमेत्तेसुं, का गणणा इयरलोएसु ?॥४८॥ जइ पियसि ओसहाइं, बंधसि बाहासु पत्थरसयाइं। कारेसि अग्गिहोम, विज्जं मंतं च संतिं च॥४९॥ अन्नाइ वि कुंटलविंटलाइं भूओवघायजणगाइ। कुणसि असरणो तह वि हु, डंकिज्जसि जमभुयंगेण॥५०॥ सिंचइ उरत्थलं तुह, अंसुपहवाहेण किं पि रुयमाणं। उवरिट्ठियं कुटुंबं, तं पि सकज्जेक्कतल्लिच्छं॥५१॥ धणधन्नरयणसयणाइया य सरणं न मरणकालम्मि। जायंति जए कस्स वि, अन्नत्थ वि जेणिमं भणियं॥५२॥ अत्थेण नंदराया, न रक्खिओ गोहणेण कुइअन्नो। धन्नेण तिलयसेट्ठी, पुत्तेहिं न ताइओ सगरो॥५३॥ इय नाऊण असरणं, अप्पाणं गयउराहिवसुओ व्व। जरमरणवल्लिविच्छित्तिकारए जयसु जिणधम्मे॥५४॥