Bhavbhavna Prakaranam

Author(s): Hemchandracharya, Vairagyarativijay
Publisher: Shrutbhuvan Sansodhan Kendra

Page 177

१६४
भवभावना
पहरंति चवेडाहिं, चित्तयवयवग्घसीहरूवेहि। कुटुंति कुहाडेहिं, ताण तणुं खयरकटुं व॥१५३॥ कयवज्जतुंडबहुविहविहंगरूवेहिं तिक्खचंचूहि। अच्छी खुड्डंति सिरं, हणंति चुटंति मंसाइं॥१५४॥ अगणिवरिसं कुणंते, मेहे वेउव्वियम्मि नेरइया। सुरकयपव्वयगुहमणुसरंति निज्जलियसव्वंगा॥१५५॥ तत्थ वि पडंतपव्वयसिलासमूहेण दलियसव्वंगा। अइकरुणं कंदंता, पप्पडपिटुं व कीरंति॥१५६॥ तिरियाणऽइभारारोवणाई सुमराविऊण खंधेसुं। चडिऊण सुरा तेसिं, भरेण भंजंति अंगाइं॥१५७॥ जेसिं च अइसएणं, गिद्धी सद्दाइएसु विसएसु। आसि इहं ताणं पि हु, विवागमेयं पयासंति॥१५८॥ तत्ततउमाइयाइं, खिवंति सवणेसु तह य दिट्ठीए। संतावुव्वेयविघायहेउरूवाणि दंसंति॥१५९॥ वसमंसजलणमुम्मुरपमुहाणि विलेवणाणि उवणेति। उप्पाडिऊण संदसएण दसणे य जीहं च॥१६०॥ तत्तो भीमभुयंगमपिवीलियाईणि तह य दव्वाणि। असुईउ अणंतगुणे, असुहाई खिवंति वयणम्मि॥१६१॥ सोवंति वज्जकंटयसेज्जाए अगणिपुत्तियाहिं समं। परमाहम्मियजणियाउ एवमाई य वियणाओ॥१६२॥ एसो मह पुव्ववेरि, त्ति नियमणे अलियमवि विगप्पेउं। अवरोप्परं पि घायंति नारया पहरणाईहि।।१६३॥ सीओसिणाइ वियणा, भणिया अन्ना वि दसविहा समए।
खेत्ताणुभावजणिया, इय तिविहा वेयणा नरए॥१६४॥ तत्तो कसिणसरीरा, बीभच्छा असुइणो सडियदेहा। नीहरियअंतमाला, भिन्नकवाला लुयंगा य॥१६५॥ दीणा सव्वनिहीणा, नपुंसगा सरणवज्जिया खीणा। चिट्ठति निरयवासे, नेरइया अहव किं बहुणा ?॥१६६॥