Kahavali Pratham Paricched Pratham Khand

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 411

[३६७]
तओ पुणरवि पुरिसो सिलापहे(8)सु पउमिणीओ रोवेउमारद्धो बलेण भणिओ - 'सिलापट्टेसु रोवियाओ कह पउमिणीओ संरोहंति ?' देवेण भणियं – 'जया ते एस भाया जीविस्सइ तया पउमिणीओ रोहिस्संति' । तओ थोवंतरं गओ तिंदुइणीरुक्खं निद्दड्डथाणुसरिसं सलिलेण सिंचंतं नरं भणइ – 'कहमेस निद्दडरुक्खो जलसित्तो वि पल्लवे विमुंचिही ?' देवेण भणियं – 'जया एयं तुहखंधट्ठियं मडयं जीविस्सइ' । तओ थोवंतरं गएण गोवो गाविकरोडीणं हरियतणाई देंतो पेच्छित्तु भणिओ बलदेवेण – 'अट्ठिभूयाओ इमाओ गावीओ कया ते हरिएण पुणो जीविस्संति ?' देवेण भणियं - 'जया एस कण्हो तुह भाया जीविस्सई'।
तओ लद्धसन्नेण बलदेवेण भणियं - 'भो ! किमेसो भाया मे अपराजियपुव्वो मओ, जेण वणंतरठिओ कोऽवि ममं एवमुल्लवइ ?' तओ देवेण सिद्धत्थरूवं काऊण भणियं - 'अ(ए)सो महाभाग ! बलदेव ! सिद्धत्थो जो तुह पुव्वभवे सारही आसि, रिट्ठनेमिसामिणो पसायाओ देवे समुप्पण्णो । भणियं च तए पुव्वमासी, जहा – “ऽहं आवईसु पडिबोहणीओ तए", ता तुह पडिबोहणत्थमागओ सो य । एस कालो पडिबोहणस्स वट्टए । जओ सामिणा पुव्वमेव भणियं, जहा - "जरकुमाराओ जणद्दणस्स मरणं" । तं च तहच्चेय जायं' । बलदेवो भणइ – 'कया उण जरकुमारेण कण्हो विणिवाइओ ?' । तओ देवेण जरकुमारवाहाइरूवं सव्वं से परिकहियं ताव जाव पेसिओ जरकुमारो पंडवाण समीवं ।
तओ बलदेवो भणइ नेहेण सिद्धत्थमालिंगिऊण – 'भो ! किमियाणिं कायव्वं ?' देवेण भणियं - 'सव्वसंगपरिच्चायं काऊण सामण्णमणुचिट्ठसु । संभरेसु अरिट्ठणेमिजिणिंदवयणाई' । तओ बलदेवेण भणियं - 'सुट्ठ मए पडिवण्णं जं तए भणियं । संभरियाई च भयवओ वयणाई, परमिमं कत्थ हरिकलेवरं करेमि (सक्करेमि?)' । देवेण भणियं - 'दोण्हं नईणं मज्झे पुलिणंमि सक्कारेमो । तहा तित्थयर-चक्किबलदेव[वासुदेव]-रा[या]ईया नरा पूयमरिहंति त्ति पूयं करेमो' । तओ तेहिं नईसंगमपुलिणंमि ठविय हरिकलेवरं पूएत्तु पुप्फ-गंधपूयाइया सक्कारियं ति ।
एत्यंतरे य भयवयाऽरिट्ठनेमिसामिणा नाऊण बलदेवस्स पव्वज्जासमयं विज्जाहरसमणो पेसिओ । दिन्ना य तेण रामस्स पव्वज्जा । सो वि तं घेत्तुमुग्गं तवच्चरणं तुंगिआसिहरे करेउमारद्धो । सिद्धत्थो वि पुव्वणेहेण रक्खणंतो(रक्खंतो) तस्सेव(तत्थेव) चिट्ठइ त्ति ।
इयरो वि जरकुमारो दक्खिणमहुरं संपत्तो, दिट्ठा य पंडवा । समप्पिओ कोत्थुहमणी । बारवईविणासणाईयं सव्वं पंडवाण कहियं ताव जाव इह संपत्तो त्ति । पंडवा य महाअक्कंदं काऊण वरिसमेत्तं च कण्हस्स पेयकिच्चं काऊण पंडुसेणस्स रज्जं जरकुमारस्स जुवरज्जं च दाऊण भयवओ समीवं पत्थिया । पत्ता य मग्गत्थं वणुद्देसमेगं ति लोयस्सुई । तत्थ वि वग्घाइभयं ति रयणीए पढमबीय-तइय-चउत्थजामेसु निरूवेइ जुहिट्ठिलो भीम-ऽज्जुण-नउल-सहदेवे पाहरिए । तओ सुत्तेसुं जुहिट्ठिलाईसु धम्मंतरायकरणत्थं भाविभावजाणावणत्थं वाऽऽगओ भीमरहरणा(सरूवो?) कलिकालो तमहिक्खिवंतो भणइ जहा – 'तुमं भाइ-गुरु-पियामहाईए हंतूण धम्मत्थं पत्थिओ ता भक्खिस्सं तुम' । सोउं चेमं कुविओ भीमो समं तेण जुज्झिउं पवत्तो । जहा जहा इ(सो) कुप्पइ तहा तहा वढतेण कलिणा जित्तो भीमो । एवं बीयतइय-चउत्थपहरुट्ठिया अज्जुण-नउल-सहदेवा वि जित्ता । सावसेसाए रयणीए सयमुट्ठिए जुहिट्ठिले तहेवाऽहिक्खिवंतो जुज्झिउकामो समागओ कली । परं जित्तो जुहिट्ठिलेन(ण) खंतीए ताव संकुचिओ जाव