Kahavali Pratham Paricched Pratham Khand

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 437

[३९३]
धम्मतित्थिगे जहा - 'ऽहं महारयणेहिं देवाहिदेवं(देवपडिमं?) काउकामो । ता तं साहेह' । न य तेसिमेगवक्कया । तओ केणाऽवि भणिओ - 'भावगम्भा देवया जा पारमत्थिगी सा सयं चेवुट्ठिस्सइ त्ति करेहि पणिहाणं । अहिवासेहि रयणमेगग्गचित्तो । छड्डेहि मिच्छा वियप्पे, जेण निच्छओ होइ' । पडिवन्नमणेण । अणुचिट्ठियं । स जाव अट्ठमोववासं करेइ ताव आउट्टा पवयणदेवया । दंसिया तित्थयरपडिमा । साहियमिमस्स वायाए गयणे जहे सा सा पारमत्थिगी देवया जीसे सरूवं सम्मं मुणंति साहुणो'त्ति ।
परितुट्ठो सागरदत्तो । निरूविया [साहवो] । तुद्वेण दिट्ठा(दरिसाविया) उत्तत्तकणगमया भगवओ अरहंतस्स पडिमा । पुच्छिया-ऽणेण साहुणो धम्मं । कहिओ साहूहिं । परिणओ एयस्स । जाओ सावगो । तेहिं सममालोवेइ रयणपडिमावइयरं। जहा - 'को तित्थयरो । केण विहिणा मयेह पइट्ठाविउं जुत्तो ?' साहूहिं भणियं - 'भगवं पाससामी संपयं समुप्पण्णकेवलनाणो पुंडवद्धणविसए विहरइ । ता तं गंतूण पुच्छसु' त्ति गओ सागरदत्तो पुंडवद्धणविसए। दिट्ठो तत्थाऽणेण पाससामी । पूइओ दव्वभावपूयाए । पुच्छिओ रयणपडिमावइयरं । सामिणा वि य समोसरणमुद्दिसित्तु देसिया विसेसओ तित्थयराइसया । साहिओ तित्थयरपडिमापइट्ठावणविही । तओ अणेण जिणुत्तविहिणा तित्थाहिवो त्ति पइट्ठाविओ पाससामी। समयंमि य पुणो अणुसासिऊण सामिणा वि पव्वाविओ सागरदत्तो जहा नवफुल्लमालिओ त्ति । सागरदत्तो त्ति गयं । नवफुल्लमालियकहा भण्णइ -
___ अत्थि मरहट्ठविसए हेल्लूरं नाम था(गा)मं । तत्थ असोगो नाम मालिगो । सो हट्टाओ फुल्लाणि विक्किणित्तु पयट्टो सगिहं । जिणपइट्ठ त्ति पविट्ठो अद्धपहे सावगगिहं । पेच्छिऊण जिणबिंबं निरूविया करंडिया । पत्ताणि नवफुल्लाणि । चडावियाणि पडिमाए । बद्धं पुन्नकम्मं । अइक्कंतो कोइ कालो । ढोइयाऽणेण रन्नो अभिणवा पियंगुमंजरी । तुट्ठो से राया । ठाविओऽणेण सेणिमहंतगो । मओ अहाउयक्खएण ।
उप्पण्णो एलउरे वाणियपुत्तो नवदम्मलक्खसामी सव्वत्थोचियकिच्चकारओ । तओ मओ तत्थेव नवदम्मकोडिसामी सप्पुरिसो जाओ । तओ मओ सुवण्णपहे नयरे नवसुवन्नलक्खसामी सप्पुरिसो जाओ। तओ मओ तत्थेव नवसुवन्नकोडिसामी सप्पुरिसो जाओ । तओ मओ [नव]रयणलक्खसामी जाओ । तओ मओ तत्थेविब्भपुत्तो नवरयणकोडिसामी सप्पुरिसो जाओ । तओ मओ वाडीपुरीए वल्लहनरिंदपुत्तो नवगामलक्खसामी सप्पुरिसो जाओ । तओ मओ तत्थेव जक्खाहिट्टियनवनिहिसामी महाराया जाओ ।
कयाइं च कीरमाणीए महाविच्छड्डेणाऽऽउगंठीए 'कहं ममेरिसी संपन्ना रिद्धि?'त्ति चितंतेण लोगप्पवायओ 'धम्मफलं'ति पुरि(री)ए पवड्ढियं महादाणं । तहा तया धम्मचक्कवट्टि'त्ति कराविया पाससामिपडिमा । तओ 'गुणो भविस्सइ'त्ति समोसरिएण तत्थेव पाससामिणा भणिओ वंदणत्थमागओ राया – 'अणुहूयप्पायं तं तए वीयरागपूजाफलं' । राया भणइ – 'कहं ?' सामिणा वि साह(हि)ए नवफुल्लमालियाइवइयरे संबुद्धो दिक्खिओ रायाऽऽउयसमसेढिं कुणंतो कालं काऊणुववन्नोऽणुत्तरसुरेसु त्ति । नवफुल्लमालिओ त्ति गयं । किंच नवफुल्लमालियकह व्व पासं गया बहुभवट्ठा(?) सुहभावयारी । संपइ पयडिज्जइ बंधुदत्तकहा -
नायउरीए राया, विक्खाओ सूरतेयनामोऽत्थि । तब्बहुमओ य इब्भो, धणवइनामो पिया तस्स ॥ सुंदरि पत्ती [ती]से, पुत्तो सपियामहस्स कयनामो । बंधुदत्तो त्ति सगुणो, रमणीयजोव्वणं पत्तो ।