Kahavali Pratham Paricched Pratham Khand

Author(s): Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad

Page 427

[३८३]
वि न मोक्खो अत्थि'त्ति कलिऊण समुहमुवट्टिओ । तओ तं पेक्खिऊण बंभदत्तो संधुक्कियकोवानलो चलिओ तदभिमुहं । लग्गमाओहणं । तओ बाणाईहिं विविहं पहरिऊण मुक्कं बंभदत्तेण चक्कं । तेण य दीहराइणो छिन्नं सीसं । तओ 'जयइ चक्कवट्टि'त्ति उच्छलिओ कलयलो । सिद्ध-गंधव्वेहिं मुक्का कुसुमवुट्ठी, वुत्तं च जहे-'स बारसमो चक्कवट्टी उप्पण्णो'त्ति । तओ जणवएण नागरिगलोएण य अभिनंदिज्जमाणो पविट्ठो निययमंदिरं । तओ पारद्धो सयलसामंतेहिं महाचक्कवट्टिरज्जाभिसेओ ।
एत्यंतरंमि य बंभदत्तस्स पुव्वं हिंडीए हिंडंतस्स एक्को कप्पडियबंभणो बहूसु आवईसु अवत्थासु य सव्वत्थ सहाओ आसि । सो य निव्वर्सेतो बंभदत्तेण भणिओ - 'जया बंभदत्तं संपत्तरज्जं सुणसि तया समागंतव्वं' । तओ सो सोऊण संपत्तरज्जं बंभदत्तं, समागंतुं बारट्ठिओ ओलग्गिउमाढत्तो । न य सो पवेसं लहइ । इओ य बारससु संवच्छरेसु निवत्ते रज्जाभिसेए बाहिं निग्गओ बंभदत्तचक्कवट्टी । तओ सो कप्पडियभट्टो चिंतेइ - 'कहमेयं जाणाविस्सामि ?' तओ झत्ति समुप्पन्नबुद्धी बहुगाओ जरखेडियाओ दीहवंसग्गबद्धाओ काऊण चिंधवाहएहिं सह पुरओ पहाविओ । तओ रन्ना दट्ठण भणियं – 'अपुव्वो कोइ एसो चिंधो' । तओ भणियं पासपरियणेण – 'देव ! कोइ एसो बारससंवच्छरिओ ओलग्गओ न नज्जइ' । तओ हक्काराविओ रण्णा । पच्चभिजाणित्ता य भणिओ - 'राउले समागच्छेज्जसु'। तओ तेण भणियं - 'को मम तत्थ पवेसं दाही ?' तओ रण्णा भणिओ पडिहारो, जहा - 'एसो भट्टो अखलियदुवारो कायव्वो' ।
___ तओ कमेण राउलंमि संपत्ते बंभदत्ते दिन्नत्थाणे समागओ कप्पडियभट्टो । तओ तं दट्ठण कओचियकिच्चो चक्की चिंतेइ – 'एसो वराओ मम सह-दक्खसहि(साहे)ज्जगो आसि । संपयं तहा करेमि जहा न सीयइ' । तओ सो भणइ – 'भट्ट ! भण, किं देमि ?' तओ तेण 'डोड्डो'त्ति काउं जिब्भालंपडेण भणियं - 'अप्पणो भोयणं धुरे दाऊण सव्वंमि भरहखेत्ते भोयणं दवावेहि' । तओ चक्की भणइ - 'किमेरिसं तुच्छं तए मग्गियं ? अण्णं पि गाम-देसाइयं मग्गसु, जेण रज्जसुहमणुभवसि' । भट्टो भणइ - 'किं मम एत्तिएणाऽऽरंभेण ?' तओ चक्किणा – ‘एवं होउ'त्ति पडिवज्जिय पढमदिवसे नियसरसरसोईए जैवावेत्ता वत्थजुयलयं दीणारं च दक्खिणाए दाऊण कमेण सो सव्वत्थ भुंजाविउमाढत्तो ।
तओ सो चक्किकमेण सामंत-मंतिहराईसु भुंजमाणो वि चक्किरसोइसमं रसमणासाएंतो चिंतेइ - 'दुट्ठ मे कयं जं न चक्किघरे चेव भोयणं पत्थियं । तो संपयं पि तुरियं होऊण भोयणवारएहिं सव्वं पि भरहखेत्तं नित्थारेमि जेण पुणो वि तत्थ भुंजामि' । एवं च सो भट्टो अणेगगाम-नगर-कुलकोडीसु भुंजतो चेवाऽपुण्णमणोरहो कालं गओ त्ति ।
___ सत्तधणूसियसरीरो य बंभदत्तचक्कवट्टी साहियछक्खंडभरहो मेलियपुप्फवईपमुहचउसट्ठिसहस्संतेउरो तप्पहाणकुरुमई-नामित्थीरयणो वरधणूवरि सव्वारोवियरज्जभारो सुहंसुहेण गमेंतो दिणाणि कयाइ विन्नत्तो नडेण, जहा – 'महाराय ! अज्ज महुयरीगीयं नाम नट्टविहिं दंसइस्सामि' । तेण वुत्तं – ‘एवं होउ' । तओ अवरण्हसमए पारद्धो नच्चिउं । एत्थंतरे दासचेडीए सयलु(लउउ)कुसुमसमिद्धं बंभदत्तस्स कुसुमदाममोग्गरमुवट्ठवियं । सगीयं च नट्टविहिं सच्चविंतस्स तस्स 'कस्सेवंविहा नाडयविही मम सपुव्व ?' त्ति चिंतितस्स 'सोहम्मे पउमगुम्मे विमाणे दिठ्ठपुव्व'त्ति सुमरियपुव्वभवो गओ मुच्छं । पडिओ भूमीए । तओ पासपरिवत्तिणा सामंतलोएण सरसचंदणालित्तो सत्थीहूओ विसेसेण सुमरियपुव्वभवभाइवइयरो तयण्णेसणत्थं रहस्सं गोविंतो