Agam 18 Upang 07 Jambudveep Pragnapti Sutra Part 01 Sthanakvasi

Author(s): Kanhaiyalal Maharaj
Publisher: Jain Shastroddhar Samiti Ahmedabad

Page 945

प्रकाशिका टीका तृ.३ वक्षस्कारः सू० ३१ भरतराशः राज्याभिषेकविषयकनिरूपणम् ९३१ उस्सुक्कं उक्करं उक्किट्ठ अदिज्जं अमिजं अब्भडपवेसं अदंडकुदंडिमं जाव सपुरजणवयं दुवालससंवच्छरिअं पमोयं घोसेह ममेय माणत्तियं पच्चप्पिणहित्ति, तएणं ते कोडुबियपुरिसा भरहेण रण्णा एवंवुत्ता समाणा हट्ठतुट्ठचित्तमाणंदिया पीइमणा हरिसवसविसप्पमाणहियया विणएणं वयणं पडिसुणेति पडिसुणित्ता खिप्पामेव हत्थिबंधवरगया जाव घोसंति घोसित्ता एयमाणत्तियं पच्चप्पिणंति तएणं से भरहे राया महयामहया रायाभिसेएणं अभिसित्ते समाणे सीहासणाओ अब्भुट्टेइ अब्भुट्टित्ता इत्थीरयणेणं जाव णाडगसहस्से हिं सद्धि संपरिवुडे अभिसेयपेढाओ पुरथिमिल्लेणं तिसोवाणपडिरूवएणं पच्चोरहइ, पच्चोरुहिता अभिसेयमंडवाओ पङिणिक्खमइ पडिणिक्खमित्ता जेणेव अभिसेक्के हत्थिरयणे तेणेव उवागच्छइ, उवागच्छित्ता अंजणगिरिकूडसण्णिभं गयवइं जाव दूरूढे। तएणं तस्स भरहस्स रण्णो बत्तीसं रायसहस्सा अभिसेयपेढाओ उत्तरिल्लेणं तिसोवाणपडिरूवएणं पच्चोरुहंति, तरणं तस्स भरहस्स रण्णो सेणावइरयणे जाव ‘सत्थवाहप्पभिईओ अभिसेयपेढाओ दाहिणील्लेणं तिसोवाणपडिरूवएणं पच्चोरुहंति, तएणं तस्स भरहस्स आभिसेक्कं हत्थिरयणं दूरूढस्स समाणस्स इट्टे अट्ठमंगलगा पुरओ जाव संपत्थिया जोऽवि य अइगच्छमाणस्स गमो पढमो कुबेरावसाणो सोचेव इहंपि कमो सकारजढो णेयव्यो जाव कुबेगेव देवराया केलाससिहरिसिंगभूयंति। तए णं से भरहे राया मज्जणघरं अणुपविसइ अणुपविसित्ता जाव भोयणमंडवंसि सुहासणवरगए अट्ठमभत्तं पारेइ पारित्ता भायणमंडवाओ पडिणिक्खमइ पडिणिक्खमित्ता उप्पि पासायवरगए फुट्टमाणेहिं मुइंगमत्थएहिं जाव भुजमाणे विहरइ तएणं से भरहे गया दुवालससंवच्छरियंसि पमोयंसि णिव्वत्तसि समाणंसि जेणेव मज्जणघरे तेणेव उवागच्छइ उवागच्छित्ता जाव मज्जणघराओ पडिणिक्खमइ पडिणिक्खमित्ता जेणेव बाहिरिया उवट्ठाणसाला जाव सीहासणवरगए पुरत्थाभिमुहे णिसीअइ