Agam 25 Prakirnak 02 Atur Pratyakhyan Sutra

Author(s): Veerbhadra Gani, Kirtiyashsuri
Publisher: Sanmarg Prakashan

Page 318

खण्ड:-२ दृष्टान्तसमुच्चयः
२७७
इय खिज्जिऊण बहुयं कंठम्मि विलग्गिऊण कन्हस्स । उम्मुक्कमहाधाहं कलुणसरं रोविउं लग्गो ।।१५।। हा कन्हं ! हा जणद्दण ! हा जायवगयणमंडणमयंक ! । हा ! कहमिहमायाओ नं बंधव-बंधुजणरहिओ ? ।।१६।। किं वा विसामि जलणे ? किं वा पविसामि गुविलपायाले ? |
कत्थ गओ सुज्झिस्सं ? कस्स मुहं दरिसइस्सामि ? ।।१७ ।। आसंसारमकित्ती संजाया मज्झ मंदभग्गस्स । जह नियभाया कन्हो जराकुमारेण निहओ त्ति ।।१८।।
नियवइयरो य एसो जराकुमारस्स पुच्छमाणस्स ।
कहिओ कण्हेण तहिं सव्वो आगमणवुत्तंतो ।।१९।। इय पलवंतो एसो बाहजलापुनदीणनयणजुओ । भणिओ जणद्दणेणं अवसर तं मज्झ पासाओ ।।२०।। हिययाओ कुत्थुभमणिं पायतलाओ समुद्धरिय बाणं । पच्छाहुत्तपएहिं पयाहि तं पंडुमहुराए ।।२१।।
जइ पुण कहमवि एही बलभद्दो तो तुमं पि मारिहिही ।
मा वयउ विणासं जायवाण वंसो निरवसेसो ।।२२।। पुव्वोइयवुत्तंतो बारवईए विणासपज्जंतो । मज्झ वि मरणं एवं कहियव्वं पंडुपुत्ताणं ।।२३।। एवं बहुप्पयारं रुयमाणो पन्नवित्तु कन्हेण । कहमवि किच्छेण तया जराकुमारो विणिग्गमिओ ।।२४ ।। कण्हो वि बाणपहरुत्थवेयणाविहुरविग्गहावयवो । वेरग्गभावियमणो चिंतिउमेवं समाढत्तो ।।२५ ।।
पेच्छाऽहो ! मम तारिसनिरुवमहरिवंससंभविस्सावि । तारिससिणिद्धबंधवसहस्सपरिवारियस्सावि ।।२६।। खणमेत्तेण वि दुद्धरविहाणवसवत्तिणो ममेयाणिं । एगाणियस्स मरणं हरिणस्स व जायमुत्तं च ।।२७।। खणदंसियसुरसरिवित्थराइं खणसुन्नरन्नसरिसाइं । एयाइं ताई कम्मिंदयालिणो जीव ! ललियाई ।।२८ ।। ता अलमिमिणा परिचिंतिएण कज्जम्मि देमि निययमणं ।
भावियजिणवयणाणं जियाण परिदेवणमजुत्तं ।।२९।। संपइ नेमिजिणेसरपमुहाणं मज्झ तित्थनाहाणं । पाया सरणं निज्जियजम्मण-मरणाण सिद्धाणं ।।३०।। साहूण नाण-दंसण-चरणजुयाणं गओ सरणमिहिं । केवलिपन्नत्तस्स वि धम्मस्स महाणुभावस्स ।।३१।।