Agam 25 Prakirnak 02 Atur Pratyakhyan Sutra

Author(s): Veerbhadra Gani, Kirtiyashsuri
Publisher: Sanmarg Prakashan

Page 370

परिशिष्टम्-४ लहु-आउरपच्चक्खाणं (२)
[गा. १ उवुग्घाओ] कुससत्थरे निसन्नो निहित्तनमियकरकमलो । आउरपच्चक्खाणं एरिसयं नवरि जंपंतो ।।१।।
[गा. २-३. अविरइपच्चक्खाणं] सव्वं पाणारंभं अलीयवयणं अदत्तदाणं च । राईभोयण विरई (अ)ब्बंभ-परिग्गहाओ य ।।२।। सयणेसु परजणेसु य पुत्त-कलत्तेसु परजणे चेव । स-परजणम्मि ममत्तं पच्चक्खायं मए सव्वं ।।३।।
[गा. ४-५. मिच्छादुक्कडं] नरयम्मि वि नेरइया, तिरिया तिरियत्तणम्मि जे केइ । दुक्खेण मए ठविया मिच्छा मिह दुक्कडं तस्स ।।४।। देवत्तणम्मि देवा, मणुया मणुयत्तणम्मि जे केइ ।। दुक्खेण मए ठविया मिच्छा मिह दुक्कडं तस्स ।।५।।
[गा. ६-१३. ममत्तच्चाओ] देवत्तणम्मि बहुसो रणंतरसणाओ गुरुनियंबाओ । मुक्काओ अच्छराओ, मा रज्जसु असुइनारीसु ।।६।। वज्जेंदनील-मरगयसमप्पहं सासयं वरं भवणं ।। मुक्कं सग्गम्मि तए, वोसिर जरकडणिकयमेयं ।।७।। नाणामणि-मोत्तियसंकुलाओ आबद्धइंदधणुयाओ । रयणाणं रासीओ मोत्तुं मा रएज्ज विभवेसु ।।८।। जे केइ देवदूसे मे (?) दिव्वदेवसरिसिल्ले । मुत्तूण तुमं तइया संपइ मा सुमर कंथइयं ।।९।। वररयणनिम्मियं पिव कणयमयं कुसुमरेणुसुकुमालं । चइऊण तत्थ देहं कुण जरदेहम्मि मा मुच्छं ।।१०।।