________________
સાધક દેહમાં રહેવા છતાં દેહાધ્યાસથી દેહ પ્રત્યેની આસક્તિથી અત્યંત પર હોય તો તે તેની મહાવિદેહ અવસ્થા છે.
કેવું મઝાનું આ ભીતરી મહાવિદેહ !
પૂજ્યપાદ જ્ઞાનવિમલસૂરિ મહારાજની મનાતી એક રચનામાં નવી જ વિભાવના લેવામાં આવી છે. વિભાવના એવી છે કે મહાવિદેહ હોય, તેનો વિજય નામનો પ્રદેશ હોય અને તેમાં આવેલી પુંડરીકિણી આદિ નગરીઓ હોય તો પ્રભુ સીમંધર ત્યાં સમવસરે જ ને !
કડી આવી છે : ‘વિજય છે શુદ્ધ મુજ ચેતના, ભક્તિ નગરી નિરુપાધિ; તિહાં વસે છે મુજ સાહિબો, જિહાં સુખ છે સહજ સમાધિ...’
મહાવિદેહ એટલે દેહાધ્યાસથી અત્યંત વિમુક્ત થયેલ સાધક. વિજય એટલે શુદ્ધ ચેતના. નિરુપાધિકા ભક્તિ તે પુંડરીકિણી આદિ નગરી. ત્યાં મારા પ્રભુ રહે છે. અને મારા પ્રભુ રહે ત્યાં હોય સહજ સમાધિ !
ક્રમસર ચરણોને જોઈએ.
મહાવિદેહ. દેહાધ્યાસથી અત્યંત ઉપર ઊઠેલી ઘટના. ત્રણસો વર્ષ પહેલાં એક મહાત્મા થયા. નામ એમનું મણિઉદ્યોતજી. પીઠમાં પાઠું થયેલું. જીવડાં માંસને કોરી રહ્યાં હોય રાત-દિવસ. કેવી વેદના હોય ! કલ્પના કરતાં પણ ધ્રૂજી જવાય. પણ તેઓ તો પોતાની સાધનામાં બરોબર ઓતપ્રોત. રાત-દિવસ સ્વાધ્યાય, ધ્યાન આદિ ચાલ્યા જ કરે.
સમાધિ શતક
૧૦૩
