________________
‘વિજય છે શુદ્ધ મુજ ચેતના...' અખંડ, અલિપ્ત મારી ચેતના તે વિજય નામનો પ્રદેશ, નૈશ્ચયિક રૂપે શુદ્ધ ચેતના રાગ-દ્વેષથી કે કર્મોથી લિપ્ત નથી. એ આનંદમયી ચેતના છે. સાધક જ્યારે આ રીતે સ્વ-પ્રતિષ્ઠિત બને ત્યારે તે વિજય-પ્રદેશમાં પ્રવેશ્યો.
નગરી કઈ ? ‘ભક્તિ નગરી નિરુપાધિ' નિરુપાધિકા ભક્તિ છે નગરી; જ્યાં પ્રભુનું સમવસરણ રચાય છે.
નિરુપાધિકા ભક્તિને પૂજ્ય દેવચન્દ્રજી મહારાજ નિર્વિષ પ્રીતિ (ઈચ્છાનું ઝેર જેમાં નથી ઘોળાયેલું એવી પ્રીતિ) કહે છે, પૂ. મહોપાધ્યાયજી યશોવિજય મહારાજ એને અકુંઠિત ભક્તિ કહે છે.
આ ભક્તિ એટલે ભક્તિ માટેની ભક્તિ... ભક્ત ભક્તિ કેમ કરે છે ? ભક્તહૃદયનો જવાબ આ છે : ભક્તિ કર્યા વિના રહી શકાતું નથી, માટે ભક્તિ કરું છું.
મહાવિદેહ. વિજય.
નગરી...
હવે પ્રભુ ત્યાં પધારે જ. સમવસરે જ. અને પ્રભુ પધારે ત્યાં હોય સહજ સમાધિ. અનાયાસ ભીતરી સુખ... એક આનંદની અજન્ન ધારા...
સમાધિ શતક
૧૦૬
