Suri Shatabdinu Sambharnu

Author(s): Kumarpal Desai
Publisher: Mahudi Madhupuri Jain SMP Trust

Page 7

આ પ્રસંગની એક બીજી પણ વિશેષતા રહી કે યોગનિષ્ઠ આચાર્ય શ્રીમદ્ બુદ્ધિસાગરસૂરીશ્વરજીની આધ્યાત્મિક, સાહિત્યિક અને સર્વવ્યાપી વિભૂતિમત્તાને દર્શાવતી અધ્યાત્મરસથી ભરપૂર એવી તેઓની અપ્રસિદ્ધ રોજનીશી (ડાયરી) આત્મચૈતન્યની યાત્રાનો વિમોચન સમારંભ પણ યોજાયો.
અનેક જુદા જુદા સંઘોમાંથી અધ્યાત્મપ્રેમીઓ, ધર્મના અનુરાગીઓ અને જિજ્ઞાસુઓ આ પ્રસંગે ઉપસ્થિત રહ્યા હતા. પાલનપુર નગરીના વડીલોએ કહ્યું કે આ પ્રકારનો પરિસંવાદ એમણે એમના જીવનમાં પહેલી જ વાર જોયો છે અને એનાથી એમણે સાચે જ જ્ઞાનવૃદ્ધિનો અનુભવ કર્યો છે.
એની પાછળનો આશય તો એટલો જ હતો કે મહાન વિભૂતિએ રચેલા ગ્રંથો માત્ર કોઈ જ્ઞાનભંડાર કે પુસ્તકાલયની યાદીમાં જ નામ રૂપે રહી જાય નહીં, પરંતુ એ ગ્રંથોમાં રહેલા શાશ્વત સત્યનો વર્તમાન સમયના અભ્યાસીઓને ઊંડો પરિચય થાય. આ ધ્યેયને વધુ સારી રીતે સિદ્ધ કરવા માટે આ પરિસંવાદમાં જે જે વક્તવ્યો થયાં, તે વક્તાઓ પાસેથી મંગાવવામાં આવ્યાં અને આનંદની વાત એ છે કે આમાં ભાગ લેનારા એકેએક વક્તાએ પોતાનું વક્તવ્ય લેખ રૂપે આપ્યું છે.
આ ગ્રંથ દ્વારા યોગનિષ્ઠ આચાર્ય શ્રી બુદ્ધિસાગરસૂરીશ્વરજીના અગાધ જ્ઞાનસાગરનો તો અનુભવ થશે જ, પરંતુ એથીય વિશેષ વર્તમાન સમયમાં એની કેટલી બધી પ્રસ્તુતતા છે એની જાણ થશે અને એના દ્વારા આપણે આપણી આવતી કાલને ઊજળી કરી શકીશું અને નવી પેઢીને આ અધ્યાત્મવારસો આપી શકીશું. તા. ૧૦-૨-૨૦૧૫
- કુમારપાળ દેસાઈ