Suri Shatabdinu Sambharnu

Author(s): Kumarpal Desai
Publisher: Mahudi Madhupuri Jain SMP Trust

Page 6

નિવેદન જ્ઞાનયોગી, કર્મયોગી અને ધ્યાનયોગી આચાર્ય બુદ્ધિસાગરસૂરીશ્વરજી મ. સાના સમયમાં જ્યારે સમાજમાં વધુ ને વધુ શિષ્યો બનાવવાની હોડ ચાલતી હતી, ત્યારે યોગનિષ્ઠ આચાર્યશ્રીએ એવા “અમર ગ્રંથશિષ્યો' તૈયાર કરવાનો નિર્ધાર કર્યો કે જેની જ્ઞાનજ્યોતિ સદૈવ સદાકાળ પ્રકાશ પાથરતી રહે અને માનવજાતિની ચેતનાને અજવાળતા રહે. આવા ગ્રંથશિષ્યો પ્રત્યે અગાધ આદર અને ગુરુઋણની પ્રબળ ભાવના ધરાવતા ગચ્છનાયક પ્રશાંતમૂર્તિ આચાર્યશ્રી પૂ. મનોહરકીર્તિસાગરસૂરિજી મહારાજે અને પ્રવચન પ્રભાવક પૂ. આચાર્યશ્રી ઉદયકીર્તિસાગરસૂરિજી મહારાજે યોગનિષ્ઠ આચાર્ય શ્રીમદ્ બુદ્ધિસાગરસૂરિજી તથા ગચ્છાધિપતિ આચાર્ય શ્રી સુબોધસાગરસૂરિજીને ભાવાંજલિ વ્યક્ત કરવાનો ઉપક્રમ જાળવી રાખ્યો છે. એમના આ સાતત્યપૂર્ણ ઉપક્રમને પરિણામે જૈન સમાજમાં અને સાહિત્ય-જગતમાં યોગનિષ્ઠ આચાર્ય શ્રીમદ્ બુદ્ધિસાગરસૂરીશ્વરજી મહારાજની અનુપમ સાહિત્યસેવાનું અને યૌગિક સાધનાનું સ્મરણ સતત ઘૂંટાતું રહ્યું છે.
પુણ્યાત્માનાં ઊંડાણો તો આભ જેટલાં અગાધ છે.' એ ન્યાયે જેમ જેમ વિદ્વાનો અને વિચારકો યોગનિષ્ઠ આચાર્ય શ્રીમદ્ બુદ્ધિસાગરસૂરીશ્વરજી મ.ની ગ્રંથસૃષ્ટિમાં પ્રવેશતા ગયા તેમ તેમ એમની વિરાટ પ્રતિભા જોઈને આશ્ચર્ય અને આનંદ અનુભવવા લાગ્યા. આમાંથી એક વિચાર આવ્યો કે યોગનિષ્ઠ આચાર્યશ્રી બુદ્ધિસાગરસૂરીશ્વરજીની દીક્ષાભૂમિ પાલનપુરમાં યોગનિષ્ઠ આચાર્યશ્રીની દીક્ષાશતાબ્દી વર્ષના નિમિત્તે શ્રી શ્રુતજ્ઞાનની આરાધનાનો અવસર યોજવો અને જુદા જુદા વિદ્વાનોને બોલાવીને એમનાં મહાન ગ્રંથરત્નો વિશે વક્તવ્યો રાખવાં. આ સંદર્ભે આચાર્યશ્રી મનોહરકીર્તિસાગરસૂરીશ્વરજી મ.સા.અને આચાર્યશ્રી ઉદયકીર્તિસાગરસૂરીશ્વરજી મ.સા.ના માર્ગદર્શન હેઠળ આચાર્યશ્રીની સરસ્વતી ઉપાસનાનો અભ્યાસ કરનારા અભ્યાસીઓને બોલાવવા અને એમનાં મનનીય પ્રવચનોનું આયોજન કરવું.
પરિણામે ૨૦૧૪ની ૧૫મી જૂને પાલનપુરના શ્રી તપાગચ્છ જૈન ઉપાશ્રય સંઘમાં એક અવિસ્મરણીય કાર્યક્રમનું આયોજન થયું અને એમાં આવેલા વિદ્વાનોએ પોતાના અભ્યાસલેખો પ્રસ્તુત કર્યા.