Paumappahasami Cariyam

Author(s): Devsuri, Rupendrakumar Pagariya
Publisher: L D Indology Ahmedabad

Page 484

४५५
वसंतकुमारकहा
भो भव्वा भवभीया, जइ तत्तो कुणह जिणधम्म।। ८५३ ॥ मुंचय विसयपिवासं, पसमामयरसरसायणं पियह ।। निज्जिणह निरयमग्गं, इंदियवग्गं समग्गं पि ॥ ८५४ ।।
अवि पज्जलिओ जलणो तिप्पइ कइया वि इंधणगणेहिं ॥ विसयामिसेण अप्पा, एस दुरप्पा न तिप्पेइ ।। ८५५ ।। अवि जलही-सलिलेहिं, महल्लकल्लोलपूरियदियंतो॥ तिप्पइ पावो जीवो न तिप्पए विसय-विसगिद्धो ।। ८५६ ॥
आवायमित्तमहुरं, दारुणपरिणाममसमदुहहेउं ।। विस-विसमं विसय-सुहं, वज्जसु सिव-सोक्खमिक्खंतो ।। ८५७ ॥ भणियं च :आवायमित्त महुरा, विवायकडुया विसोवमा विसया ॥ अविवेगजणायरिया, विवेइजणवज्जिया पावा ।। ८५८ ॥ एत्थंतरम्मि कुमरो पुच्छइ भववास-पासबंधाओ ।। किह छुट्टोसि मुणीसर ! वेरग्गे कारणं किं वा? ॥ ८५९ ॥ अह जंपइ मुणिनाहो, कुमार ! एगग्गमाणसो होउं ॥ निसुणसु साहिज्जं तं, मह चरियं जणिय अच्छरियं ।। ८६० ।। फालिहमणिमयभित्तिसंकंत-ससंक-कंतरूवेहिं । कयमिणनिच्चकलहा, विज्जइ विज्जापुरी भरहे ॥ ८६१ ॥ वेरिपुरंधिनिरग्गलगलंतनवनेत्तसलिलधाराहि ॥ सिप्पंतकंतिकाणण-निवहो वि जो तहिं राया ॥ ८६२ ॥ तस्स य अणुद्धराए, मणोरमायारहरियजणनयणो । देवीए सुओ जाओ, सीहो नामेण सुपसिद्धो ॥ ८६३ ॥ वम्महनिवासभवणं, वियारसयसगोयरं रम्मं ।। परिवड्डियरंगत्तं, कमसो नवजोव्वणं पत्तो ।। ८६४ ।। अह वाहकेलिदेसे, केलिनिमित्तं तुरंगमारूढो । विविरीयसिक्खिएणं, तेण वि हरिओ इमो सहसा ।। ८६५ ।।