Paumappahasami Cariyam

Author(s): Devsuri, Rupendrakumar Pagariya
Publisher: L D Indology Ahmedabad

Page 523

४९४
सिरिपउमप्पहसामिचरियं
सोलस वि सहिज्जंतो, बावीस परिसहा चेव ।। १३४३ ।। पिंडो घिप्पइ सुद्धो, वायालिसेहिं तह य दोसेहिं ।। वरचरणं च चरिज्जइ, सत्तट्ठ भवाउ जस्स कए ॥ १३४४ ।। मासियभत्तं काउं, समएणिक्केण उज्जूसेणीए ।। सिरिपउमप्पहनाहो,संपत्तो सासयं सुक्खं ।। १३४५ ।। पहुणो कुमारभावे, पुव्वाणद्धट्ठमाणि लक्खाणि ।। रज्जम्मि पुव्वलक्खा इगवीसं अट्ठ संजुत्ता ॥ १३४६ ॥ सोलसपुव्वंगेहिं ऊणं परूवियं समए । पउमप्पहस्स तीसं पहुणो लक्खाण सव्वाऊ ॥ १३४७ ।। सोलस्स पुव्वंगेहिं अहिया तह चेव हुंति नायव्वा ।। एक्कं च पुव्वलक्खं, पहुणो परियायकालम्मि ।। १३४८ ।। अह सव्वे वि सुरिंदा, निव्वाणगयं मुणित्तु जिणनाहं ।। सोयजलभरियकंठा, तारं मुंचंति पुक्कारं ।। १३४९ ।। हा नाह नाह! सुचरियअगाह, भवअवडपडियजणवाह ! ॥ हा देव देव ! तिहुयणजणसमुदयविहियपयसेव ।। १३५० ॥ संसाररन्नमज्झे, सरणागयवच्छलो वि हा देव ! ॥ मोत्तुं अणाहा अम्हे,कह सिवनयरं वयसि एक्को ॥ १३५१ ।। किं चिट्ठसि मोणेणं, पुणरवि न कहेमि नाह ! किं धम्मं ।। तुह मुहचंदचकोरा, चिटुंति इमे सुरसमूहा ।। १३५२ ।। वयणं च नयणहीणं, उच्चिय कमलं व कमलसरसलिलं ।। सेन्नं व पहु-विमुक्कं, तुमं विणा भाइ भुवणमिणं । १३५३ ।। सद्धम्मदेसणामयधारासारेहिं देव ! को इण्हि ॥ धाराधरो व्व तिहुयणमणवणमंकूरियं करिही ॥ १३५४॥ सोयंधयारगहियं, भुवणं पि हु पिच्छिऊण इह सक्को॥ अप्पाणं संठविउं, जंपइ किं कुणह इय सोयं ।। १३५५ ।। सोउं तेसिं किज्जइ, मरिऊणं जे पडंति संसारे ।।