________________
सतं-२०, वग्गो-,सत्तंसत्तं-, उद्देसो-२
लोयागासे णं भंते! किं जीवा, जीवदेसा? एवं जहा बितियसए अत्थिउद्देसे तह चेव इह वि भाणियव्वं, नवरं अभिलावो जाव धम्मत्थिकाए णं भंते! केमहालए पन्नत्ते? गोयमा ! लोए लोयमेत्ते लोयपमाणे लोयफुडे लोयं चेव ओगाहित्ताणं चिट्ठइ । एवं जाव पोग्गलत्थिकाए।
अहेलोए णं भंते! धम्मत्थिकायस्स केवतियं ओगाढे? गोयमा ! सातिरेगं अद्धं ओगाढे। एवं एएणं अभिलावेणं जहा बितियसए जाव ईसिपब्भारा णं भंते! पुढवी लोयागासस्स किं संखेज्जइभागं ओगाढा?0 पुच्छा। गोयमा ! नो संखेज्जतिभागं ओगाढा; असंखेज्जतिभागं ओगाढा; नो संखेज्जे भागे, नो असंखेज्जे भागे, नो सव्वलोयं ओगाढा । सेसं तं चेव ।
[७८२]धम्मत्थिकायस्स णं भंते! केवतिया अभिवयणा पन्नत्ता ? गोयमा ! अणेगा अभिवयणा पन्नत्ता, तं जहा--धम्मे ति वा, धम्मत्थिकाये ति वा, पाणातिवायवेरमणे ति वा, मुसावायवेरमणे ति वा एवं जाव परिग्गहवेरमणे ति वा, कोहविवेगे ति वा जाव मिच्छादंसणसल्लविवेगे ति वा, रियासमिती ति वा, भासास० एसणास० आदाणभंडमत्तनिक्खेवणस० उच्चार पासवणखेल-सिंघाण पारिट्ठावणियासमिती ति वा, मणगुत्ती ति वा, वइगुत्ती ति वा, कायगुत्ती ति वा, जे यावन्ने तहप्पगारा सव्वे ते धम्मत्थिकायस्स अभिवयणा ।
अधम्मत्थिकायस्स णं भंते! केवइया अभिवयणा पन्नत्ता? गोयमा ! अणेगा अभिवयणा पन्नत्ता, तं जहा - अधम्मे ति वा, अधम्मत्थिकाये ति वा, पाणातिवाए ति वा जाव मिच्छादंसणसल्ले ति वा, रियाअस्समिती ति वा जाव उच्चार पासवण जाव पारिट्ठावणियाअस्समिती ति वा, मणअगुत्ती ति वा, वइअगुत्ती ति वा, कायअगुत्ती ति वा, जे यावन्ने तहप्पगारा सव्वे ते अधम्मत्थिकायस्स अभिवयणा। आगासत्थिकायस्स णं० पुच्छा। गोयमा ! अणेगा अभिवयणा पन्नत्ता, तं जहा - आगासे ति वा, आगासत्थिकाये ति वा, गगणे ति वा, नभे ति वा, समे ति वा, विसमे ति वा, खहे ति वा, विहे ति वा, वीयी ति वा, विवरे ति वा, अंबरे ति वा, अंबरसे ति वा, छिड्डे ति वा, झुसिरे ति वा, मग्गे ति वा, विमु ति वा, अद्दे ति वा, वियद्दे ति वा, आधारे ति वा वोमे ति वा, भायणे ति वा, अंतरिक्खेति वा, सामे ति वा, ओवासंतरे ति वा, अगमे ति वा, फलिहे ति वा, अणंते ति वा, जे यावऽन्ने तहप्पगारा सव्वे ते आगासत्थिकायस्स अभिवयणा ।
जीवत्थिकायस्स णं भंते! केवतिया अभिवयणा० पुच्छा। गोयमा ! अणेगा अभिवयणा पन्नत्ता, तं जहा--जीवे ति वा, जीवत्थिकाये ति वा, पाणे ति वा, भूते ति वा, सत्ते ति वा, विष्णू ति वा, या ति वा, जेया ति वा, आया ति वा, रंगणे ति वा, हिंडुए ति वा, पोग्गले ति वा, माणवे ति वा, कत्ता तिवा विकत्ता ति वा, जए ति वा, जंतू ति वा, जोणी ति वा, सयंभू ति वा, ससरीरी ति वा, नायये ति वा, अंतरप्पा ति वा, जे यावन्ने तहप्पगारा सव्वे ते जीवअभिवयणा ।
पोग्गलत्थिकायस्स णं भंते!0 पुच्छा। गोयमा ! अणेगा अभिवयणा पन्नत्ता, तं जहा--पोग्गले ति वा, पोग्गलत्थिकाये ति वा, परमाणुपोग्गले ति वा, दुपदेसिए ति वा, तिपदेसिए ति वा जाव असंखेज्जपदेसिए ति वा अणंतपदेसिए ति वा खंधे, जे यावऽन्ने तहप्पकारा सव्वे ते पोग्गलत्थिकायस्स अभिवयणा ।
सेवं भंते! सेवं भंते! ति०।
[दीपरत्नसागर संशोधितः ]
*वीसइमे सए बीइओ उद्देसो समतो*
[392]
[५-भगवई
