Agam 43 Mool 04 Uttaradhyayan Sutra Part 01

Author(s): Kamalsanyamvijay, Vajrasenvijay
Publisher: Bhadrankar Prakashan

Page 458

४२४
उत्तरज्झयणाणि-१ ततो भृगुरपत्यार्थमनेकैरुपयाचितैः । देवानाराधयत्युच्चैः पृच्छन् नैमित्तिकांस्तथा ॥१०॥ इतश्च गोपदेवौ तौ विज्ञायावधिनेति वै । भृगोः पुरोहितस्यावां भविष्यावः सुतौ यथा ॥११॥ ततस्तौ साधुरूपेण भृगुपार्श्वे सुरौ गतौ । भृगुणा वन्दितौ साधू सभार्येण पुरोधसा ॥१२॥ तद्धर्मदेशनां श्रुत्वा पुरोधा भृगुरादरात् । श्राद्धधर्मं ससम्यक्त्वं जग्राह गृहिणीसखः ॥१३।। सदारो भृगुरप्राक्षीद् भगवन् ! सन्ततिः कदा ? | भवित्री नो मुनिः प्राह द्वौ पुत्रौ वो भविष्यतः ॥१४।। तयोर्बालकयोरेव संवेगात् प्रव्रजिष्यतोः । विघ्नो युवाभ्यां नो कार्यो धर्मविघ्नो ह्यनर्थदः ॥१५।। तौ च प्राप्तव्रतौ भव्यान् बहून् सम्बोधयिष्यतः । एवमुक्त्वा सुरावन्तर्धाय स्वर्ग समीयतुः ॥१६।। तत्र दिव्यसुखं भुक्त्वा तौ गीर्वाणौ ततश्च्युतौ । कुक्षौ पुरोधोभार्यायाः पुत्रत्वेनावतेरतुः ॥१७॥ ततः पुरोहितः साकं कलत्रेण पुरा क्वचित् । प्रत्यन्तग्राममागत्य तस्थिवान् सपरिच्छदः ॥१८।। तत्र प्रसूता तज्जाया जातौ द्वौ दारको ततः । पाल्यमानौ लाल्यमानौ वर्धमानौ यथासुखम् ॥१९॥ कुर्वाणौ च कलाभ्यासं कलाचार्यस्य सन्निधौ । व्युद्ग्राहितौ पितृभ्यां तौ मेमौ प्रव्रजतामिति ॥२०॥ यथैते भिक्षुका बालान् हत्वाऽश्नन्ति पलं ततः । युवां मा श्लिष्यतामेतान् कदाप्यात्महितैषिणौ ॥२१।। अन्येद्युस्तौ बहिर्दामाद् रममाणौ विनिर्गतौ । इतश्च केचिदाजग्मुर्मुनयो मार्गमाश्रिताः ॥२२॥ ततस्तौ बालकौ साधून् दर्श दर्श भयद्रुतौ । पलाय्यारूढवन्तौ द्राग् महान्तं वटपादपम् ॥२३॥