Adhyatma Gita

Author(s): Dhirajlal D Mehta
Publisher: Jain Dharm Prasaran Trust Surat

Page 8

મહારાજશ્રીએ આવા પ્રકારના સ્વપ્નનું ફળ કહ્યું કે, તમારે ત્યાં જન્મ પામનાર બાળક મહાપુરુષ થશે. કાં તો છત્રપતિ રાજા-મહારાજા થશે. અથવા દીક્ષા ગ્રહણ કરી કોઇ મહાયોગી પુરુષ થશે. જૈનશાસનના પ્રતિપાલક થશે. આ વાત જાણી તે પતિ-પત્ની વધારેને વધારે ધર્મપરાયણ બન્યાં.
ગર્ભકાળ પૂર્ણ થતાં વિક્રમ સંવત ૧૭૪૬માં ચંદ્ર જેવા ઉજ્જવળ પુત્રને ધનબાઇએ જન્મ આપ્યો. સ્વપ્રને અનુસારે કુટુંબી લોકોએ તે બાળકનું દેવચંદ્ર એવું નામ નક્કી કર્યું ધીરે ધીરે આ દેવચંદ્ર નામનો બાળક આઠ વર્ષની વયવાળો થયો. ત્યારે વિહાર કરતા કરતા પૂજ્ય રાજસાગરજી મહારાજશ્રી ત્યાં પધાર્યા. માતપિતાએ પોતાની પ્રતિજ્ઞા પ્રમાણે આ બાળક ગુરુજીને સમર્પિત કર્યો. ગુરુજી શ્રી રાજસાગરજી મહારાજશ્રીએ બે વર્ષ પોતાની પાસે રાખીને ભણાવ્યો તથા વૈરાગ્યવાહી વાણી દ્વારા તે બાળકને મઠારી મઠારીને ઘણો જ સંસ્કારી અને વૈરાગ્યવાસિત કર્યો. આત્મકલ્યાણના માર્ગે જવાની મનોવૃત્તિવાળો બનાવ્યો.
વિક્રમ સંવત ૧૭૫૬માં ૧૦ વર્ષની વયે આ દેવચંદ્રજીને પ્રવ્રજ્યા પ્રદાન કરવામાં આવી. પૂજ્ય શ્રી જિનચંદ્રજી મહારાજે કાળ પાકતાં વડીદીક્ષ આપી. તેમનું નામ રાજવિમલજી રાખ્યું. પરંતુ લોકો તો તેઓને દેવચંદ્રજી એવા જૂના નામે જ બોલાવવા લાગ્યા.
સમય જતાં આ બાળમુનિની યોગ્યતા જોઈને શ્રી રાજસાગરજીએ સરસ્વતી માતાની સાધના કરી, સરસ્વતી માતા પ્રસન્ન થયાં અને દેવચંદ્રજી મહારાજશ્રીની જીભ ઉપર જ વસવાટ કર્યો. જેના પ્રતાપે શ્રી દેવચંદ્રજીએ ઘણા ઘણા જૈન સાહિત્યની રચના કરી. કાવ્ય બનાવવાની સુંદર કળા તેઓને પ્રાપ્ત થઇ.જેના કારણે પૂર્વકાળના મહાત્મા પુરુષોએ બનાવેલા અનેક ગ્રન્થો ઉપર સંસ્કૃત-ગુજરાતી ભાષામાં ટીકા-વિવેચનો લખવાની-બનાવવાની શરૂઆત કરી.
જૈનશાસનમાં પરમાત્મા શ્રી મહાવીરસ્વામીની ૬૧મી પાટે પૂજ્ય શ્રી જિનચંદ્રસૂરિજી થયા તેઓએ ઘણી શાસનપ્રભાવના કરી. તપાગચ્છમાં પૂજ્ય હીરસૂરીશ્વરજી મહારાજશ્રીનો કાળ ચાલતો હતો. ત્યારે ૧૫ મા સૈકામાં આ જિનેશ્વરસૂરિજી થયા. તેમના શિષ્ય પુણ્યપ્રધાનજી થયા. તેમના શિષ્ય શ્રી સુમતિસાગરજી થયા કે જેઓ વિદ્યાવિશારદતાના બિરુદને પામ્યા હતા. તેમના શિષ્ય સાધુરંગજી થયા. તથા તેમના શિષ્ય શ્રી રાજસાગરજી મ.શ્રી થયા. કે જેમની પાસે આ અધ્યાત્મગીતા બનાવનાર શ્રી દેવચંદ્રજી મહારાજશ્રીના માતા-પિતાએ આવી પ્રતિજ્ઞા લીધી હતી કે જો અમારે પુત્રરત્નનો જન્મ થશે તો જૈનશાસનને સમર્પિત કરીશું.