________________
૨૮
“શ્રીમદ્ રાજચંદ્ર વિષયક પત્રવ્યવહાર
ખુલાસો (૧૪) :
પરમાત્મતુલ્ય દશા પ્રાપ્ત કરવી એ જ જૈનદર્શનનું લક્ષ્ય છે' એ તમારી વાત અમારે મન અધૂરી છે, અમે તો એમ કહીએ છીએ કે, “જિનશાસનની આરાધના-સાધનાનું લક્ષ્ય માત્ર પરમાત્માતુલ્ય બનવું તે નથી, પરંતુ પરમાત્મારૂપે જ બની જવું - ખુદ પરમાત્મા જ બની જવું તે છે'.
વળી, પરમાત્માતુલ્ય બનવાની ભાવના ભાવવી તે ભયંકર નથી, પરંતુ તે ભાવનાના મિથ્યા આવેગમાં ઘસડાઈ જઈ, રાગ-દ્વેષ અને અજ્ઞાન-ગ્રસ્ત પોતાના વાસ્તવિક વ્યક્તિત્વને ભૂલી જઈ, પોતાને સર્વજ્ઞ તીર્થકર, સિદ્ધરૂપ કહેવું તે અતિભયંકર જ છે.
ફરી એકવાર શરૂઆતની વાત દોહરાવું છું કે “અમને શ્રીમદ્જી પર અંગત દ્વેષ કે નિંદા કરવાનો લેશમાત્ર ભાવ નથી. એમની જિનવચન અનુસારી વાતો અમે અંતરના બહુમાનપૂર્વક સ્વીકારીએ છીએ. છતાંય વાસ્તવિકતા હોવાથી શ્રીમદ્જીના સાહિત્યમાં સૌ કોઈ મુમુક્ષુઓ ક્ષીર-નીરનો વિવેક કરી સાચું સત્ય ગ્રહણ કરે અને જિનવચનવિરુદ્ધ ગણીને ખોટી વાતોનો ત્યાગ કરે” એ જ પ્રવચન કે પત્ર લખવા પાછળનો મૂળભૂત ઉદ્દેશ છે.
પ્રાંતે તમે સામે ચાલીને પ્રશ્નાવલીની શરૂઆત કરી, તેથી અતિવ્યસ્તતા વચ્ચે પણ સમય ફાળવીને તમારા પ્રશ્નોનો વિસ્તારપૂર્વક સંતોષજનક સમાધાન આપવાનો નમ્ર પ્રયાસ કરેલ છે. હવે તમારી ફરજ છે કે, આની સામેના કોઈ વજૂદવાળા યોગ્ય પ્રત્યુત્તરો તમારી પાસે હોય તો તે અવશ્ય મોકલશો અને ન હોય તો સત્યના સ્વીકારનો પ્રતિપત્ર અવશ્ય પાઠવશો. અન્યથા અમે સમજીશું કે, તમને જેટલી બીજાને સત્ય સમજાવવાની મહેચ્છા છે તેટલી પોતાને સત્ય સમજવાની આતુરતા નથી.
જિનાજ્ઞાવિરુદ્ધ કાંઈપણ નિરૂપણ થયું હોય તો હાર્દિક મિચ્છામિ દુક્કડ.
૬.
•
